Ozarboyjonda muddatidan ilgarigi prezident saylovlari qizg‘in o‘tishi kutilmoqda

Ozarboyjon Markaziy saylov komissiyasi (MSK) rahbari Mazohir Panaxov 11 aprel kuni bo‘lib o‘tadigan muddatidan ilgarigi saylovlarda ishtirok etadigan saylovchilar soni an'anaga ko‘ra  yuqori bo‘lishini kutayotganini aytdi. U "RIA Novosti"ga bergan intervyusida shunday bayonot bergan.

Panaxovning so‘zlariga ko‘ra, jamiyatda prezident saylovlariga yuqori qiziqish kuzatilmoqda, elektorat orasida "ma'rifatparvarlik ishlari" olib borilgan. Uning aytishicha, 11 partiya saylovlarni kuzatish uchun o‘z nazoratchilarini ro‘yxatdan o‘tkazgan. 

"Yuqorida qayd etilganlardan kelib chiqib, o‘ylaymanki, saylovchilar faolligi yuqori darajada bo‘ladi. Qoidaga ko‘ra, prezident saylovlarida saylovchilar faolligi yuqori bo‘ladi", - dedi Panaxov. 

2013 yilgi davlat rahbari saylovlarida ishtirokchilar ko‘rsatkichi 72 foizdan oshgan, 2008 yilda - 75 foiz, 2003 yilda esa 62 foizni tashkil qilgan. 

Panaxov MAK 900 ga yaqin xalqaro va 60 mingdan ziyod mahalliy kuzatuvchilarni ro‘yxatdan o‘tkazganini ma'lum qildi. 21 mamlakatning 118 nafar xodimi OAV vakillari sifatida ro‘yxatdan o‘tgan.

Sakkiz kishi davlat rahbari lavozimi uchun kurash olib boradi: hukmron "Yangi Ozarboyjon" partiyasi nomzodi, mamlakatning amaldagi prezidenti Ilhom Aliyev, "Butun Ozarboyjon xalq fronti" partiyasidan Gudrat Gasanguliyev, Ozarboyjon sotsial-demokratik partiyasidan Araz Alizoda, "Milliy tiklanish harakati" partiyasidan Faraj Guliyev, "Frontchilar tashabbus guruhi"dan Rozi Nurullayev, "Zamonaviy Musavat" partiyasidan Hofiz Gajiyev, mustaqil ishtirokchi Zohid Oruj, Ozarboyjon Demokratik partiyasidan Sardor Mamedov.