Video: Boysundagi tog‘ yo‘lida mashinalar boshqaruvsiz «balandlikka yuradi»

Surxondaryoning Boysunidagi Padang qishlog‘ini eshitganmisiz? Boysundan chiqishda o‘sha mashhur Omonxona qishlog‘iga yetmasdan chapga kiriladi. Ushbu qishloqda «Boysun bahori» xalqaro etnografik festivali o‘tkazilishi uchun qizg‘in tayyorgarlik ketmoqda.

Padang qishlog‘idan 8 km narida joylashgan magnitli tog‘ haqida eshitganmisiz? Ushbu hudud xaritalarda 38°16'55.55" shimoliy kenglik, 67°14'52.69" sharqiy uzunlikda belgilangan.

Mahalliy aholi bu yerni «magnitli joy» deb atashadi. Bir qaraganda, balandlikka chiqilayotgandek ko‘rinadigan bu qiyalikda tezlik uzatmasi neytral holatga qo‘yilsa va tormoz bosilmasa, balandlikdan tushib kelayotgan mashina yana orqaga ketadi. Yo‘lga suv quyilsa — u ham tepaga qarab oqadi. 

Boshni aylantiruvchi bu sinoatning sababi nima ekan? Anomaliyami yoki optik illyuziya? Bunga faqat mutaxassislar javob bera olishi mumkin...