Shavkat Mirziyoyev AQShga rasmiy tashrif bilan boradi

May oyining ikkinchi yarmida O‘zbekiston Respublikasi prezidenti Shavkat Mirziyoyev AQSh prezidenti Donald Tramp taklifiga binoan Amerikaga rasmiy tashrifini amalga oshiradi. Tashrifning aniq sanasi hozircha rasman e'lon qilinganicha yo‘q.

Kun.uz axborot manbasining ma'lumot berishicha, aprel oyida O‘zbekiston TIV rahbari Abdulaziz Komilov AQSh elchisi Pamela Spratlen bilan uchrashuvda joriy yildagi turli darajada bo‘lib o‘tadigan O‘zbekiston–AQSh uchrashuvlari muddatlari, jumladan, may oyida O‘zbekiston rahbarining Amerikaga rasmiy tashrifiga tayyorgarlik ko‘rish masalalarini ham muhokama qilgan.

Mayning boshlarida esa Spratlen xonim Senatda, Prezident huzuridagi Strategik va mintaqalararo tadqiqotlar institutida uchrashuvlar, shuningdek, O‘zbekiston Respublikasi Tashqi ishlar vazirligida yana uchrashuv o‘tkazgan. Uchala rasmiy shaxs ham bir paytlar O‘zbekiston tashqi ishlar vazirligini boshqarganligidan oliy darajadagi tashrifga hozirlik qizg‘in borayotganligi taxmin qilingan edi.

O‘zbekiston prezidenti o‘tgan yili ham AQShga borgan edi. Bu tashrif 18–20 sentabr kunlarida BMT Bosh Assambleyasining 72-sessiyasi doirasida kechgandi. O‘shanda Nyu-Yorkda o‘zbek-amerika biznes-forumi ham o‘tkazilgandi.