Shavkat Mirziyoyev: «​Bizni xalq sinayapti, juda qattiq sinayapti​»​

O‘zbekiston Respublikasi Prezidenti Shavkat Mirziyoyev Ulug‘nor tumanida davom etayotgan videoselektor yig‘ilishida ishsizlik va davlat rahbarini qiynayotgan tashvish haqida gapirib o‘tdi. 

«​Bizni xalq sinayapti, juda qattiq sinayapti. Qachongacha yetib borar ekan, qaysi marra, qachon bular eski tos, eski hammom bo‘lishiga o‘tadi, degan xalqimizda hali qo‘rquv borligi - haqiqat.

Meni hech kim alday olmaydi, sizlarni ming maqtaganingiz, balandparvoz gap aytganingiz bilan, men ishonmayman. Men pastda yurgan odamman. Shuning uchun birinchi qadam qo‘yayotganimiz - odamlarni ishontirish, adolatli mehnat qilish. Bu juda katta, yuksak ishonch. Bunga munosib bo‘la olamizmi - bu mening eng katta tashvishim»​, deya ta'kidlagan Shavkat Mirziyoyev.

Kun.uz muxbirining xabar qilishcha, davlat rahbari yig‘ilish ishtirokchilariga qarata ana shu mas'uliyatni anglagan holda, «tashvishni birga hazm qilish»ni so‘ramoqda.

«Shunda, mana shunday, ulug‘ ayyom kunlarda xalqimiz ozgina bizdan rozi bo‘ladi. Xalqimizni qiynayotgan narsa - ish joyi yo‘q, ertangi kuniga ishonchi yo‘q. Men ma'ruza qilishga kelganim yo‘q. Men sizlarning yuzingizga qarab, haqiqiy ahvolni bilish uchun keldim. Mana shuni unutmaylik. Bir narsani bilib olaylik: xalqni bundan keyin aldab bo‘lmaydi», deydi Prezident.

Shavkat Mirziyoyev xorijda ishlayotgan mehnat muhojirlari haqida shunday to‘xtalib o‘tdi:

«Ular bekorga chetda yurgani yo‘q. Ularga ish joyini tashkil qilib berolmaganimiz uchun chetlarda yuribdi. Hamma balo ham shundan keladi», deya ishsizlik masalasiga murojaat qilgan davlat rahbari.