29 may kuni O‘zbekiston Respublikasi Prezidenti Shavkat Mirziyoyev raisligida eksport-import, mahalliy byudjyetga qo‘shimcha tushumlarni ta'minlash, qishloq xo‘jaligida g‘o‘za parvarishi, g‘alla o‘rimi, takroriy ekinlar va suvdan oqilona foydalanish kabi muhim tadbirlarni samarali o‘tkazish bilan bog‘liq bugungi kunda g‘oyat dolzarb bo‘lib turgan masalalarga bag‘ishlangan videoselektor yig‘ilishi bo‘lib o‘tdi.
«Biz hali ham bozor bilan ishlashni bilmaymiz. Nega men Jalilovni («O‘zbekoziqovqatxolding» xolding kompaniyasi raisi Tohirjon Jalilov - tahr.) qo‘ydim? Kattakonlarga yaxshi ko‘rinadigan paytlar o‘tdi. Bozor narxi bilan sotsak ertaga manfaat bo‘ladi. Investorlar bizdagi vaziyatni juda yaxshi biladi. Ertaga nima bo‘larkin, deb o‘ylayapti. Har kuni katta-katta gazetalarda maqolalar berilmoqda. Har kuni provokatsion maqolalar ko‘p. Lekin, tanlagan yo‘limizdan qaytmaymiz. O‘zbekistonda 10 mlrd dollarlik eksport salohiyat bor, aynan qishloq xo‘jaligida. Shuni qilsak, banklar ham, odamlarimiz ham rozi bo‘ladi.
Xitoyning karantin, veterinariya bo‘yicha idorasi yaqinda O‘zbekistonda korxona ochadi. Endi eng katta bozorimiz - Xitoy. Ushbu davlat yaqin.
Bosh prokuror endi eksportyorlarni 10 kunda bir marta yig‘ib, muammolarni muhokama qiladi. Eksport bilan shug‘ullanmagan hokimga prokuror chora ko‘rishi shart. Eksport bilan hammamiz shug‘ullanishimiz kerak», - deya prezidentning so‘zlarini keltirgan Kun.uz muxbiri.
