Ulug‘bek Inoyatov Samarqanddagi tadbirda ishtirok etayotgan vaqtda ishdan olindi

Bugun, 20 iyun kuni O‘zbekiston Respublikasi Xalq ta'limi vaziri Ulug‘bek Inoyatov uch nafar o‘rinbosari bilan birga ishdan olindi.

Ulug‘bek Inoyatov mazkur lavozimda 2013 yildan buyon ishlab kelayotgandi. U 2017 yil fevralida Shaxmat federatsiyasiga ham rahbar bo‘lgandi.

Qizig‘i shundaki, ishdan bo‘shatilgani e'lon qilingan vaqtda vazir Samarqand shahrida boshlangan umumta'lim maktabi o‘quvchilari o‘rtasida fizika va astronomiya fanlaridan Mirzo Ulug‘bek nomidagi xalqaro olimpiadaning ochilish marosimida ishtirok etayotgandi. U Xalq ta'limi vaziri sifatida tadbirda so‘zga chiqdi.

Ayni vaqtda sobiq vazir va uning o‘rinbosarlarining keyingi faoliyati haqida ma'lumotlar yo‘q.

Bugundan Samarqand shahrida ilk marotaba umumiy o‘rta ta'lim maktablarining fizika va astronomiya fanlaridan Mirzo Ulug‘bek nomidagi xalqaro olimpiada boshlandi. Unda Turkmaniston, Qozog‘iston va Qirg‘iziston vakillari ham ishtirok etmoqda.