O‘zbekistonda saratonga chalingan bemorlar soni qancha ekanini bilasizmi?

Dunyoda har yili 16 millionga yaqin birlamchi saraton holati aniqlanadi. Jumladan, O‘zbekistonda 100 mingdan ziyod bemor onkologik kasalliklar bo‘yicha ro‘yxatda turadi. KUN.UZ muxbiri 2 iyul kuni O‘zbekiston Milliy matbuot markazida "O‘zbekistonda onkologiya xizmatining holati: onkologik kasalliklarning oldini olish va barvaqt aniqlashning samarali tizimini yaratish, tashxislash va davolashning ilg‘or usullarini joriy etish, zamonaviy diagnostika va davolash apparatlari bilan ta'minlash holati va istiqbollar" mavzusidagi matbuot anjumanida berilgan ma'lumotga asoslanib, shu haqida xabar berdi.

Jahon sog‘liqni saqlash tashkilotining ma'lumotiga ko‘ra, onkologik kasalliklariga chalinish ko‘rsatkichlari yildan-yilga o‘sib bormoqda. Dunyoda har yili 16 millionga yaqin birlamchi saraton holati aniqlanadi. Jumladan,  O‘zbekistonda ham 100 mingdan ziyod bemor onkologik kasalliklar bo‘yicha hisobda turadi.

Onkologik kasalliklar ichida sut bezi saratoni yetakchilik qiladi. Keyingi o‘rinlarda me'da, bachadon bo‘yi va o‘pka saratoni qayd etiladi.

Shuni afsus bilan ta'kidlash joizki, 50 foizdan ortiq holatlarda ushbu kasallik kechki, ya'ni uchinchi va to‘rtinchi bosqichlarda aniqlanmoqda, bunda esa ularni to‘laqonli davolash mushkul bo‘ladi.

Prezident Shavkat Mirziyoyevning 2017 yil 4 aprelda qabul qilingan "2017-2021 yillarda O‘zbekiston Respublikasida onkologiya xizmatini yanada rivojlantirish va aholiga onkologik yordam ko‘rsatishni takomillashtirish chora-tadbirlari to‘g‘risida"gi qarori bu borada o‘z yechimini kutayotgan ustuvor vazifalarni hayotga tatbiq etishda dasturil amal bo‘lmoqda. Qarorda belgilangan vazifalar izchillik bilan hayotga tatbiq etilishi natijasida viloyatlardagi 15 ta onkologiya dispanseri Respublika ixtisoslashtirilgan onkologiya va radiologiya ilmiy-amaliy tibbiyot markazining filiallariga aylantirildi. Onkologiya muassasalari rekonstruksiya va modernizatsiya qilindi, onkologik kasalliklar diagnostikasi va davolashning zamonaviy standartlari ishlab chiqildi va tasdiqlandi.

Shuningdek onkologiya bilan bog‘liq muammolarning oldini olish maqsadida Saraton profilaktikasi markazi tashkil etildi, ko‘krak bezi va bo‘yin saratoni skrining tadqiqotlari boshlab yuborildi. Aholi o‘rtasida onkologik jihatdan xabardorlikni oshirish maqsadida maxsus guruhlar tuzilib, ular tomonidan muntazam ravishda chiqishlar tashkil qilinmoqda.

Sut bezi saratoni skriningini o‘tkazish uchun 13 ta mobil va 16 ta statsionar mammografik uskunalar xarid qilinmoqda. Bundan tashqari, Farg‘ona viloyatida tajriba tariqasida qizilo‘ngach, me'da va kolorektal saraton bo‘yicha skrining tadqiqotlarini o‘tkazish rejalashtirilgan.