Uchuvchilarning parvoz vaqtida mushtlashib ketishi tufayli aviahalokat yuz berishiga bir baxya qoldi

Iroqning Iraqi Airways aviakompaniyasi uchuvchilari bortida 150 yo‘lovchi bo‘lgan samolyotning parvozi vaqtida bortda yuz bergan mushtlashuv tufayli ishdan chetlatildi. Bu haqda Al Sumaria xabar bermoqda.

Yo‘lovchilarning xabar berishicha, uchuvchilarni xavfsizlik xizmati xodimlari ajratib qo‘yishga majbur bo‘lgan. Shuningdek, ta'kidlanishicha, mushtlashuv chog‘ida kabinaning bir qismiga jiddiy ziyon yetgan. Mojaroga aslida nima sabab bo‘lgani xabar qilinmayapti.

Samolyot 11,2 kilometrlik balandlikda bo‘lgan. Xabar berilishicha, mushtlashuv aviahalokatga ham olib kelishi mumkin edi.

Uchuvchilar jiddiy jarimaga tortilishi mumkin. Hozirgi paytda har ikki uchuvchi parvozlardan chetlatildi, Transport vazirligi surishtiruv ishlarini boshladi.