Samarqand mintaqaviy ta'lim xabiga aylantirilmoqda

So‘nggi vaqtlarda O‘zbekistonda ta'lim sohasida ko‘plab  yangiliklar kuzatilmoqda. Jumladan, oliy ta'lim tizimida sirtqi va kechki ta'lim yo‘lga qo‘yilmoqda, masofadan ta'lim olish imkoni ko‘rib chiqilmoqda, ikkinchi va undan keyingi oliy ma'lumot olishga ruxsat etilgan oliy ta'lim muassasalarining ro‘yxati tasdiqlandi, qator xorijiy universitetlarning filiallari ochilmoqda. Bundan tashqari, yangi ta'lim dargohlari faoliyati yo‘lga qo‘yilmoqda. OTMlarga qabul jarayonlari va imtihonlar olish borasida ham talaygina yangiliklar mavjud.

Bugunga kelib Samarqandni ta'lim xabi (markazi)ga aylantirish nuqtai nazaridan ushbu yo‘nalishga yanada katta e'tibor qaratilmoqda. Hozirda viloyatda ko‘plab oliy ta'lim muassasalari faoliyat olib bormoqda, Samarqandda yangi universitet - xalqaro "Ipak yo‘li" turizm universiteti faoliyatining yo‘lga qo‘yilishi ham mamlakatimizda turizm va ta'lim sohalariga berilayotgan e'tiborning yaqqol natijasidir. Ayni damda O‘zbekistonda turizmga qaratilayotgan e'tiborni inobatga oladigan bo‘lsak, ushbu ta'lim dargohining kelgusidagi ahamiyati juda katta bo‘lishi shubhasiz.

O‘zbekiston Respublikasi Vazirlar Mahkamasining “Samarqand davlat universiteti faoliyatini yanada takomillashtirish chora-tadbirlari to‘g‘risida” Hukumat qaroridan ko‘zlangan asosiy maqsad ham ta'lim dargohini mintaqaviy universitet sifatidagi o‘rnini yanada kuchaytirish va mavqeini oshirishdan iboratdir.

Xo‘sh, Vazirlar Mahkamasining mazkur qarori nimalarni nazarda tutadi?

• Qarorga muvofiq, 2018-2021 yillarda Samarqand davlat universiteti faoliyatini yanada takomillashtirish bo‘yicha kompleks chora-tadbirlar dasturi tasdiqlandi;
• 2018-2019 o‘quv yilidan boshlab bakalavriat ta'lim yo‘nalishlari o‘quv rejalarining ixtisoslik fanlari hajmini 30 foizgacha oshirib, o‘quv rejalar va fan dasturlarini ishlab chiqish hamda amaliyotga joriy etish, shuningdek Universitet professor-o‘qituvchilari va olimlar tomonidan tayyorlangan darslik, o‘quv qo‘llanma hamda boshqa o‘quv-uslubiy adabiyotlarni Universitet kengashining qaroriga asosan nashrga tavsiya etish vakolatlari berildi;
• Universitetda masofaviy o‘qitish tizimini yo‘lga qo‘yish nazarda tutiladi;
• Xorijiy mamlakatlardan kelib, universitetda ta'lim olayotgan talabalar uchun yangi talabalar turar joyi quriladi va jihozlanadi;
• Konfutsiy haykali o‘rnatiladigan Universitet hududida joylashgan to‘qqiz qavatli o‘quv va ma'muriy binoda O‘zbekiston-Xitoy milliy me'morchiligi an'analariga muvofiq ravishda qurilish ishlari amalga oshiriladi hamda ushbu binoning har bir qavati rivojlangan xorijiy mamlakatlarning nufuzli oliy ta'lim muassasalari andozalariga moslashtiriladi;
• Universitetning moddiy-texnika bazasini mustahkamlash maqsadida Samarqand 1-sonli pedagogika kolleji hamda Samarqand pedagogika va xizmat ko‘rsatish kollejining faoliyati tugaganidan so‘ng ularning bino va inshootlari tegishli hududlari bilan birga Universitetga operativ boshqarish huquqi asosida beriladi;
• Universitet bosh binosi joylashgan hududda Samarqandning jahon sivilizatsiyasi rivojiga qo‘shgan hissasi, tarixi, madaniyati, Markaziy Osiyoda ta'lim va ma'rifat markazi sifatida shakllangan an'analari aks ettirilgan arxitektura ansambli barpo etiladi;
• Universitetda amalga oshirilayotgan ilmiy izlanishlarning nufuzini yanada yuksaltirish maqsadida fundamental fanlar va muhandislik-texnika fanlari sohalari bo‘yicha doktorlik dissertatsiyalari himoyalarini o‘tkazishga mo‘ljallangan ixtisoslashtirilgan Ilmiy kengashlar ochiladi;
• Universitet huzurida fizika, matematika, kimyo va biologiya sohalariga ixtisoslashgan maktab faoliyati yo‘lga qo‘yiladi.