Putin Skripallar ishi bo‘yicha tergovchini taqdirladi

Prezident Vladimir Putin Rossiya tergov qo‘mitasining qator tergovchilarini taqdirlash to‘g‘risidagi farmonni imzoladi. Hujjat 30 iyul, dushanba kuni RF huquqiy axborot portalida e'lon qilindi.

Mukofot olganlar orasida favqulodda vaziyatlar va teraktlar, firibgarlik holatlari bo‘yicha ishlarni yuritgan tergovchilar ham bor. Xususan, Jasorat ordenini Tergov qo‘mitasi raisi huzuridagi alohida muhim ishlar bo‘yicha katta tergovchi Konstantin Krivorotov oldi. U 224 kishining halok bo‘lishiga sabab bo‘lgan Sinaydagi A321 bortidagi teraktni tergov qilgan.

Bundan tashqari, hujjatda Tergov qo‘mitasi raisi huzuridagi alohida ishlar bo‘yicha katta tergovchi Sergey Chernishevning ismi bor. U polkovnik Zaxarchenko va Solsberi shahrida zaharlangan Yuliya hamda Sergey Skripallar ishi bo‘yicha tergovni olib borgan.

II darajali «Vatan oldidagi xizmatlari uchun» ordeni medali Roman Nesterovga topshirildi. U Rossiyaning sobiq iqtisodiy rivojlanish vaziri Aleksey Ulyukayev ishiga rahbarlik qilgan. Xuddi shunday orden bilan Kirov oblasti sobiq gubernatori Nikita Belix ishi bo‘yicha tergovchi Roman Mukachev ham taqdirlandi.

Eslatib o‘tamiz, avvalroq Skripallarni zaharlashda gumonlanayotganlar Buyuk Britaniyadan qochib ketgani xabar qilingandi.