Isroil yangi aeroport qurish uchun sun'iy orol yaratmoqchi

Isroil o‘z sohillari yaqinida yangi aeroportni joylashtirish uchun sun'iy orol yaratish loyihasini ishlab chiqmoqda. Bu haqda mamlakat bosh vaziri Binyamin Netanyaxuning devonxonasi xabar berdi.

Tegishli vazirlik va idoralar rahbariyati bilan o‘tkazilgan yig‘ilishda u mamlakatga tashrifi oshib borayotgan sayyohlarni kutib olishni ta'minlash uchun ana shunday reja tayyorlashga topshiriq berdi.

«Netanyaxu Isroil davlati sohilidagi sun'iy orolda aeroport qurish rejasini tuzish bo‘yicha topshiriq berdi», — deyiladi matbuot relizida.

Avvalroq OAVda ushbu loyihani amalga oshirish uchun 10-15 yil talab etilishi va taxminan 10 milliard dollar sarflanishi aytilgandi.