Adliya vazirligi Qoraqalpog‘istonda «samosud» qilingan fuqaroga huquqiy yordam ko‘rsatdi

O‘zbekiston Respublikasi Adliya vazirligi Inson huquqlarini himoya qilish boshqarmasi Qoraqalpog‘iston Respublikasi Beruniy shahri Shobboz bozorida sodir etilgan etilgan jinoyat yuzasidan holatni o‘z nazoratiga oldi.

Ma'lumki, ijtimoiy tarmoqlarda o‘g‘rilikda gumon qilingan fuqaroning “samosud” qilingani va bozorning darvozasiga osilganiga doir videolavha tarqagan edi. Jabrlangan fuqaro D.N.ning o‘ziga nisbatan sodir etilgan zo‘ravonlik haqidagi murojaati Qoraqalpog‘iston Respublikasi Beruniy tuman adliya bo‘limi tomonidan ko‘rib chiqildi. Zo‘ravonlik xatti-harakatlarini sodir etgan shaxslarga nisbatan qonuniy choralar ko‘rish uchun Beruniy tuman Ichki ishlar bo‘limiga yuborildi.
  
Adliya vazirligining yodga olishicha, O‘zbekiston Respublikasi Konstitutsiyasining 26-moddasida jinoyat sodir etganlikda ayblanayotgan har bir shaxsning ishi sudda qonuniy tartibda, oshkora ko‘rib chiqilib, uning aybi aniqlanmaguncha u aybdor hisoblanmasligi, hech kim qiynoqqa solinishi, zo‘ravonlikka, shafqatsiz yoki inson qadr-qimmatini kamsituvchi boshqa tarzdagi tazyiqqa duchor etilishi mumkin emasligi belgilangan.

Jinoyat kodeksining 39-moddasiga ko‘ra, ushlash vositalari va usullariga, qilmishning hamda uni sodir etgan shaxsning xavflilik darajasiga, shuningdek ushlash sharoitiga butunlay mos kelmaydigan, ushlash zarurati taqozo etmagan holda ushlanayotgan shaxsga qasddan zarar yetkazish ushlash choralari chegarasidan chetga chiqish, deb topilishi qayd etilgan.