Pora olayotganida qo‘lga tushgan shaxs IIV xodimiga ham pora berishga urindi

Xorazm viloyati Hazorasp tumanidagi Tibbiy birlashma bo‘limi boshlig‘i Q.X o‘z xodimidan pora olish va IIB xodimiga pora berish jinoyatlarini sodir qilgani uchun qo‘lga olingan. Bu haqda Xorazm viloyati IIB matbuot xizmati xabar bermoqda. 

Shu yilning iyulida Q.X o‘z xizmat mavqesidan foydalangan holda, qo‘l ostidagi xodimi, hamshira Sh.B.dan 50 AQSh dollari miqdorida pora olayotgan paytda ushlangan edi. Shundan so‘ng, unga nisbatan O‘zbekiston Respublikasi JKning 214-moddasi 2-qismi «b» bandi bilan jinoyat ishi ochilgan. 

Biroq, u IIB huzuridagi Tergov bo‘linmasi boshlig‘i A.Ro‘zimovga murojaat qilib, agar jinoyat ishini o‘zining foydasiga hal qilib bersa, unga taklif qilingan 50 AQSh dollarini 10 barobari miqdorida pul berishini bildiradi. Shundan so‘ng, pora berishga uringan poraxo‘r shu kuni taklif qilgan pulining 400 AQSh dollarlik qismini bo‘linma boshlig‘iga berayotganida jinoyat ustida qo‘lga olinadi. 

Mazkur holat yuzasidan, shu kunning o‘zida unga nisbatan JKning 211-moddasi 1-qismi bilan jinoyat ishi qo‘zg‘atildi. Hozirda tergov surishtiruv ishlari olib borilmoqda.