Rekordlar va oltin. Svetlana Radzivil va Nadiya Dusanovaga teng raqib topilmadi

Indoneziyaning Jakarta va Palembang shaharlarida davom etayotgan Osiyo o‘yinlarida yengil atletikaning balandlikka sakrash bahslarida O‘zbekiston terma jamoasi birato‘la 2ta medal oldi.

Balandlikka sakrash musobaqasida oltin medal uchun kurash O‘zbekiston yengil atletika terma jamoasi a'zolari Svetlana Radzivil va Nadiya Dusanova o‘rtasida kechdi.

Yakunda tajribali Svetlana Radzivil 1,96 metrlik balandlikni zabt etib, 2010 yilda o‘zi o‘rnatgan Osiyo o‘yinlari rekordini yangilagan holda ketma-ket uchinchi marta Osiyo o‘yinlari chempioniga aylandi. Nadiya Dusanova 1,94 metrlik natijani qayd etib, o‘zining shaxsiy rekordini yangiladi va kumush medal bilan taqdirlanadigan bo‘ldi. Bu uning ikkinchi marta Osiyo o‘yinlarida kumush medal olishidir. U 2010 yilda Guangjoudagi Osiyo o‘yinlarida Radzivildan keyingi ikkinchi o‘rinni olgandi. 2014 yilgi musobaqalarda u bronza medali bilan kifoyalangan.

Uchinchi o‘rinni 1,84 m natijasida to‘xtagan qozog‘istonlik Nadejda Dubrovskaya egalladi.

Ushbu natijadan keyin O‘zbekiston hisobidagi medallar soni 45taga yetdi. Ayni vaqtda O‘zbekiston delegatsiyasi 12ta oltin, 17ta kumush, 16ta bronza medal jamg‘argan holda umumjamoa hisobida 7-o‘ringa ko‘tarilib oldi.