AQSh, Fransiya, Germaniya va Kanada Skripallar ishi bo‘yicha yangi ayblovni qo‘llab-quvvatladi

Buyuk Britaniya, AQSh, Fransiya, Germaniya va Kanada Rossiya razvedkasi boshqarmasi sobiq polkovnigi Sergey Skripal va Yuliya Skripalga suiqasd bo‘yicha qo‘shma bayonot e'lon qildi. Bu haqda Germaniya matbuot xizmati xabar qilgan.

G‘arb davlatlari bir ovozdan bu amaliyot Rossiya hukumati tomonidan ma'qullaganini bildirishgan.

«Kechagi xabar bizning xorijiy josuslarning bizning hududlarimizda tinch aholiga qarshi qaratilgan dushmanona xatti-harakatlariga javoban birdamligimizni yanada mustahkamladi», — deyilgan bayonotda.

G‘arb davlatlari yetakchilari Solsberidagi hujum uchun yana bir bor norozilik bildirishgan va ushbu ish bo‘yicha yangi ma'lumotlarga ega bo‘lganlarni Buyuk Britaniya politsiyasiga murojaat qilishga chaqirishgan.

«Biz Sergey Skripal va Yuliya Skripalning zaharlanishi bo‘yicha olib borilayotgan tekshiruv jarayonida erishilgan natijalarga qo‘shilamiz va suiqasdda ayblanayotgan ikki gumondorga e'tibor qaratamiz. Biz Britaniya politsiyasining ishini yuqori baholaymiz», deyilgan bayonotda.

Rossiya razvedka boshqarmasi sobiq polkovnigi Sergey Skripal 2006 yilda Buyuk Britaniya foydasiga josuslikda qilishda ayblanib Rossiyada sudlangan edi, keyin u 2010 yilda AQSh bilan mahbuslar almashinuvi davomida ozod qilindi. Shundan keyin u Buyuk Britaniyaga doimiy yashash uchun ko‘chib o‘tdi va Angliyaning Solsberi shahrida yashadi. 

Shu yilning 4 mart kuni Solsberida Sergey Skripal va uning qizi Yuliyani hushsiz holatda topishdi.

12 mart kuni Buyuk Britaniya bosh vaziri Tereza Mey parlamentga murojaatida Skripallar Rossiyada ishlab chiqarilgan, asab tizimini falajlovchi «Novichok» moddasi orqali zaharlangani haqida ma'lum qildi. Moskva tomoni bu ayblovni rad etib, 2017 yilda Rossiya hududidagi barcha kimyoviy qurollar yo‘q qilinganini iddao qiladi.

5 sentabr kuni London Solsberidagi suiqasd ijrochilari bo‘lgan ikki shaxs fotosuratlarini e'lon qildi. Tereza Mey bular Rossiya razvedka boshqarmasi xodimlari Aleksandr Petrov va Ruslan Boshirov ekanini ma'lum qildi.