Korporativ boshqaruv ilmiy-ta'lim markazi Biznes va boshqaruv respublika oliy maktabiga aylantirildi 

“Korporativ, loyiha boshqaruvi va davlat xaridlari sohasida kadrlarni tayyorlash, qayta tayyorlash va ularning malakasini oshirish tizimini takomillashtirish bo‘yicha qo‘shimcha chora-tadbirlar to‘g‘risida” O‘zbekiston Prezidentining qarori qabul qilindi.

Hujjatda aytilishicha, mazkur qaror qabul qilinishidan maqsad, oliy ta'lim muassasalari va oliy o‘quv yurtidan keyingi ta'lim muassasalarida ta'limning ilg‘or usullarini joriy etish, shuningdek, korporativ, loyiha boshqaruvi va davlat xaridlari sohasida kadrlarni tayyorlash, qayta tayyorlash va ularning malakasini oshirish tizimini yanada takomillashtirishdir.

Qarorga muvofiq, O‘zbekiston Respublikasi Prezidenti huzuridagi Loyiha boshqaruvi milliy agentligi huzuridagi Korporativ boshqaruv ilmiy-ta'lim markazining nomi O‘zbekiston Respublikasi Prezidenti huzuridagi Loyiha boshqaruvi milliy agentligi qoshidagi Abu Rayhon Beruniy nomidagi Biznes va boshqaruv respublika oliy maktabi deb o‘zgartirildi. 

Biznes va boshqaruv oliy maktabiga O‘zbekiston Respublikasi Prezidenti huzuridagi Loyiha boshqaruvi milliy agentligi bilan kelishilgan holda shu sohadagi yetakchi xorijiy ta'lim muassasalari bilan ushbu muassasalarning o‘quv rejalari va dasturlari asosida O‘zbekiston Respublikasida tan olinadigan davlat namunasidagi diplomlar bergan holda magistratura dasturlari yuzasidan “ikki diplom” (double degree) modeli bo‘yicha o‘qishni tashkil etish borasida kelishuvlar tuzish huquqi berildi.

Bundan tashqari, oliy maktab normativ va qisqartirilgan muddatlarda (an'anaviy va masofaviy texnologiyalar), ishlab chiqarishdan ajralmagan holda magistraturada o‘qishni tashkil etish, shuningdek, Biznes va boshqaruv oliy maktabi dasturlari bo‘yicha o‘qish uchun nomzodlarni tanlab olish mezonlarini belgilash, oliy ta'lim muassasalariga, oliy o‘quv yurtidan keyingi ta'lim, kadrlarni qayta tayyorlash va ularning malakasini oshirish muassasalariga, ularning mulkchilik shakli va bo‘ysunuvidan qat'i nazar, masofaviy o‘qitishni tashkil etish huquqiga ega bo‘ldi.