Smartfonga bog‘lanib qolmaslikning 5 usuli

Ko‘pchilik tadqiqot natijalari odamlar telefonini kuniga 150 martaga yaqin tekshirishlarini qayd etmoqda. Smartfonlar hayotingiz va ishingiz bilan uzviy bog‘liq bo‘lsa, bu odatdan qanday xalos bo‘lish mumkin? Smartfonga tobelikni yengishga muvaffaq bo‘lgan 5 nafar kishi o‘z maslahatlari bilan bo‘lishdi.

Chalg‘ituvchi ilovalarni o‘chiring

“Ilgari doim ayfonga chalg‘irdim, keyin esa u bolalarga ajratishim kerak bo‘lgan e'tiborni ham “olib qo‘ya boshladi”, - deydi Google Ventures’ning dizayn bo‘yicha hamkori Jyeyk Napp. – Ana o‘shanda meni chalg‘itadigan barcha ilovalarni o‘chirib tashladim: Twitter, Facebook, Instagram, YouTube.Gmail ilovasi, o‘rnatilgan pochta va hatto Safari’ni o‘chirdim.

Napning so‘zlariga ko‘ra, bu yechim unga erkinlik olib keldi. Dastlab bu qisqa tajriba bo‘ladi, deb o‘ylagandi. Biroq oradan olti yil o‘tsa hamki, uning telefonida mazkur ilovalar yo‘q.

Qurilmangiz hajmini oshiring

Envisioning Technology kompaniyasi asoschisi Michell Zappa ana shunday g‘aroyib maslahat bergan.

Qurilmaning katta hajmi unga telefondan foydalanib bo‘lmaydigan vaziyatlarga diqqatni qaratish imkonini berdi. “Smartfon o‘rniga iPad mini 3G’dan foydalanishni boshladim, - deydi u. Unda qo‘ng‘iroqlardan tashqari, ayfonning barcha funksiyalari bor edi. Planshet katta va tushlik stoli ustida undan foydalanish noqulay. Ba'zida vaqtimni bekorga sarflayotganimni tushundim va tvitter va instagram lentasini tekshirmay qo‘ydim. Keyichalik yana smartfondan foydalana boshladim, biroq uni ongli ravishda bajarardim”.

Shunday qilingki, telefondan foydalanishingiz noqulay bo‘lsin

“Tobelikdan qutulish uchun birinchi qadam bu –telefondan qanchalik tez-tez foydalanishingizni tekshiradigan maxsus ilovani o‘rnatish”, - deb hisoblaydi grafik dizayner Sara Lourens. U ekranga tikilgancha qancha vaqt o‘tkazishini kuzatadigan Moment ilovasini smartfoniga o‘rnatgan. Shuningdek, Sara ekran sozlamalarini almashtirib turishni odat qildi. Ikki hafta standart, keyingi ikki hafta esa oq-qora rejimdan foydalandi. Uning so‘zlariga qaraganda, oq-qora rejim sababli telefondan faqat ish bo‘yicha foydalanib, ijtimoiy tarmoqlarni bekorga varaqlab o‘tirishni bas qilgan.

Telefonni boshqa xonada qoldiring

Investor Yoni Rextman ruhshunos unga bergan maslahat bilan o‘rtoqlashdi: boshqa xonaga ketayotganingizda telefonni o‘zingiz bilan olmang. Ilgari Rextman smartfonni doim o‘zi bilan birga olib yurar, agar batareya quvvati oz bo‘lsa, darhol uyiga ketardi. Investorning so‘zlariga ko‘ra, doimiy ravishda quvvat oldirgani uchun ayfoni quvvatsiz bo‘lmagan. Psixolog Rextmanni telefonni boshqa xonada qisqa muddat (masalan, 15 daqiqa)ga qoldirish, keyin esa muddat davomiyligini oshirib borishni so‘ragan.

Telefonni aviarejimga o‘tkazing

“Bir necha hafta ilgari Instagram’ni o‘chirdim, bu ajoyib qaror bo‘ldi”, - deya tan oladi Fast Company SMM-menejyeri Jon Konvers Taunsend.  – Tunda aviarejimni yoqadigan bo‘ldim. Instagram’ni qayta o‘rnatishga to‘g‘ri keldi, dugonam u menga yuboradigan xabarlarni ko‘rmayotganligimdan xafa bo‘ldi. Biroq deyarli har tunda aviarejimni yoqaman yoki hech bo‘lmaganda xabarnomalarni o‘chiraman”.