Rosgvardiyani kim ovqatlantiradi? Navalniy va Zolotov mojarosiga Medvedevning qanday aloqasi bor?

Rossiya Milliy gvardiyasi rahbari Viktor Zolotov Korrupsiyaga qarshi kurashish fondi rahbari Aleksey Navalniyga videomurojaat yo‘llab, uni duelga chorladi. Avgust oyida Rosgvardiyani harbiylar uchun mahsulotlarni oshirilgan narxlarda sotib olishda ayblab chiqqan Navalniy ayni vaqtda ma'muriy jazo sifatida 30 kun muddatga qamalgan.

Korrupsiyaga qarshi kurashish fondi 23 avgust kuni Rosgvardiya uchun oziq-ovqat mahsulotlari yetkazib berilishidagi qoida buzilishi bo‘yicha tekshiruvlari natijasini e'lon qilgandi. Fond xodimlari aniqlashicha, 2017 yil dekabrida «Myasokombinat «Drujba narodov» MJCh Rosgvardiya uchun yagona yetkazib beruvchiga aylangach, mahsulotlar uchun narxlar bir necha bor ko‘tarilgan. «Drujby narodov» xo‘jayini sifatida Boris Kantemirov ko‘rsatilgan — u o‘z vaqtida Ichki ishlar vazirligining Ichki qo‘shinlari Markaziy arxivida boshliq bo‘lgan. Rosgvardiya 2016 yilning aprelida aynan Ichki qo‘shinlar bazasida tashkil etilgan. IIV ichki qo‘shinlari boshlig‘i bo‘lgan Viktor Zolotov Rosgvardiya rahbariga aylangan.

Fond materiallarida karamning 1 kilogrammi o‘tgan yili 14,96 rublga xarid qilingani holda, bu yil 46,78 rubldan sotib olinayotgani, narx o‘tgan yildagidan 3 barobar qimmatlashgani aytilgandi. Piyozning 1 kilogrammi esa o‘tgan yili 16 rubldan, bu yil esa 37 rubldan sotib olinmoqda. Olma sharbatining narxi ham ikki barobar oshgan - 1 litri uchun 40 rubl o‘rniga 87 rublga. Kartoshka, sabzi, yog‘ va boshqa mahsulotlar bilan ham shu ahvol.

Rosgvardiya va «Drujby narodov» o‘rtasidagi shartnoma hajmi 2 milliard 400 million rubni tashkil etgan.

Rosgvardiya uchun belgilangan narxlar nafaqat o‘tgan yildagi narxlardan, balki hozirgi bozor narxlaridan ham yuqori. Masalan, Moskvadagi «Pyatyorochka» do‘konida, do‘kon ijarasi, tashish va xizmatchilar uchun xarajatlar chiqarib tashlanganida 1 kilogramm piyoz bahosi 26 rubldan sotiladi, katta miqdordagi mahsulotlar uchun ko‘tarasiga buyurtma beradigan Rosgvardiya esa piyozning 1 kilogrammini 37 rubldan sotib olmoqda.

Yog‘. Pyaterochkada 1 kg uchun 381 rubl, Rosgvardiya 470 rubldan oladi; 
Kartoshka. Pyaterochkada 24 rubl, Rosgvardiya 31 rubldan sotib oladi; 
Karam. Pyaterochkada — 14 rubldan, Rosgvardiya uchun 46 rubl; 
Olma sharbati. Pyaterochkada — 76, Rosgvardiya uchun — 87 rubl. 

«Albatta, savol tug‘iladi. Bu o‘g‘irlangan milliardlar kimning cho‘ntagiga ketmoqda?

Buni FSBdan so‘rash kerak, Tergov qo‘mitasini savolga tutish kerak. Zolotovdan, Putin va Medvedevning do‘stlaridan so‘rash kerak. Ular aniq biladi», deya yakunlagandi Navalniy o‘z chiqishini.

31 avgust kuni Rosgvardiya Korrupsiyaga qarshi kurashish fondiga javob qaytardi: «O‘zini korrupsiyaga qarshi kurashuvchi sifatida ko‘rsatadiganlarning bunday «tekshiruvi» Rossiya Federatsiyasi milliy gvardiyasi jangchilarining Federal xizmati rahbariyatiga qaratilgan ochiq ayblov bo‘lib, bu yolg‘onlar va ivg‘olarga to‘ladir. Amaldagi qonunchilikka binoan hukumat tomonidan belgilab berilgan tashkilot RF Milliy gvardiyasiga oziq-ovqat mahsulotlari yetkazib berish xizmatini ko‘rsatadi. Maqola mualliflari 2017 yilgi narxlarni 2018 yilning iyunidagi narxlar bilan solishtirishgan va mavsumiy narx o‘zgarishlarini hisobga olishmagan. Dekabr oyida mahsulotlar narxi tushib, iyun oyida narxlar maksimal darajada ko‘tariladi».

Bir kun o‘tib Rosgvardiyaning ikkinchi javobi chiqdi: «Ha, avval narxlar arzon edi, ammo mahsulotlar sifati yomon bo‘lgan. Endi narxlar yuqori, lekin mahsulotlar sifati yaxshi!».

Bugun esa Rosgvardiyaning rahbari Viktor Zolotov shaxsan javob qaytardi: «Janob Navalniy, sizni duelga chaqiraman, sizdan shirali kotlet tayyorlamoqchiman».

Qayd etish kerakki, Rosgvardiyani qimmat ammo sifatli mahsulotlar bilan ta'minlay boshlagan «Drujby narodov»  kombinati rahbari Boris Kantemirov o‘z vaqtida Zolotov bilan birga hamkorlik qilishdan tashqari, oxirgi yillarda biznesmen Boris Vaninskiy bilan ham ishlagan. Korrupsiyaga qarshi kurashish fondining hisoblashicha esa, Vaninskiy RF bosh vaziri Dmitriy Medvedevga yaqin odam hisoblanadi.

Kantemirov «Resurs Servis» kompaniyasiga ham rahbarlik qilgan. Bu kompaniya Medvedevning Moskva viloyati, Maslovo hududida joylashgan «norasmiy qarorgohi»ga to‘g‘ridan-to‘g‘ri aloqador bo‘lgan.

«Bizda shunday tasavvur hosil bo‘lmoqdaki, Rosgvardiya «Drujba Narodov» kombinati benefitsiari yoki Medvedevning o‘zi, yoki uning atrofidagi odamlardan biri», — deyilgandi Korrupsiyaga qarshi kurashish fondi tadqiqotida.

Eslatib o‘tamiz, 2017 yil martida Korrupsiyaga qarshi kurashish fondi «On vam ne Dimon» («U sizga Dimon emas») nomli tadqiqotlari natijalarini e'lon qilgandi. Unda RF bosh vaziri Dmitriy Medvedev boshqa shaxslar nomiga rasmiylashtirilgan qimmatbaho turar joylardan foydalanishi haqida aytilgandi. «On vam ne Dimon» materiallari ortidan Rossiyada korrupsiyaga qarshi keng ko‘lamli namoyishlar o‘tkazilgandi.

Aziz Qarshiyev