JPMorgan Chase yangi moliyaviy inqiroz qachon yuz berishi mumkinligini ma'lum qildi 

Bloomberg axborot agentligi JPMorgan Chase moliya xoldingining 2008 yildagi jahon moliyaviy inqirozi 10 yilligiga bag‘ishlangan tadqiqotiga tayangan holda, yangi jahon moliyaviy inqirozi 2020 yildayoq boshlanishi mumkinligini ma'lum qildi.

Prognoz mualliflarining ta'kidlashicha, bunda yaxshi yangilik shundaki, yangi inqiroz oqibatlari avvalgisidan kamroq darajada og‘riqli bo‘ladi. 

Tahlilchilar Jon Normand va Federiko Manikardining eslatishicha, 2007-2008 yillardagi jahon inqirozi vaqtida S&P 500 fond indeksi eng maksimal qiymatlaridan 54 foizga tushib ketgan. Navbatdagi inqirozda fond bozorlari qulashi rivojlanayotgan davlatlar aktivlari qiymati shundoq ham ancha pasaygani sababli uncha katta ko‘lamli bo‘lmaydi. 

Tahlilchilarning ta'kidlashicha, keyingi inqirozning qancha vaqt davom etishini hozircha aytishning iloji yo‘q, chunki bu ishlarning qanchalik yomon borishiga bog‘liq bo‘ladi.

Bu orada JPMorgan Chase’ning boshqa bir vakili Marko Kolanovich navbatdagi moliyaviy inqiroz “Likvidlikning ulkan inqirozi” vujudga kelishi xavfi sababli juda jiddiy bo‘lishi mumkinligidan ogohlantirgan. Kolanovich bozorda narxlarning jiddiy pasayishi boshlanishi holatida passiv boshqariluvchi fondlar vujudga kelishi sababli qadrsizlanib borayotgan aktivlarga yetarlicha miqdorda xaridorlar topilmasligi, bu esa narxlarning yana va yana pasayishiga olib kelishini aytgan.

Mutaxassisning fikricha, yangi moliyaviy inqirozning 2019 yil oxirigacha boshlanishi ehtimoli kichik, biroq AQSh va Xitoy o‘rtasidagi savdo mojarosi ushbu inqirozning kelishini tezlashtirishi ham, keyinga surishi ham mumkin.