Rashid Qodirov va Mirag‘lam Mirzayev ustidan sud boshlangani haqidagi xabarlar tasdiqlanmadi

12 sentabr kuni OAVda Yunusobod tumani sudida O‘zbekistonning sobiq bosh prokurori Rashid Qodirov hamda Toshkent prokurorining sobiq o‘rinbosari Mirag‘lam Mirzayev ustidan sud boshlangani to‘g‘risida tarqalgan xabarlar o‘z tasdig‘ini topmadi.

O‘zbekiston Oliy sudi rasmiy vakili Aziz Obidov bu xabarlarga munosabat bildirar ekan, hali tergov jarayoni davom etayotgani, sobiq prokurorlar bo‘yicha ish tuman sudida ko‘rib chiqilmasligini ma'lum qilgan.

Shu yilning 22 fevralida Toshkentda O‘zbekiston sobiq bosh prokurori Rashid Qodirov Jinoyat-protsessual kodeksi 221-moddasi tartibida qo‘lga olingandi. Unga nisbatan «Tovlamachilik», «Hokimiyat yoki mansab vakolatini suiiste'mol qilish», «Pora olish» moddalari bo‘yicha jinoyat ishi ochilgan. Shuningdek, ushbu jinoyat ishi bo‘yicha bosh prokurorning sobiq o‘rinbosarlari hamda Toshkent viloyatining sobiq prokurorlari bo‘lmish Jamshid Fayziyev va Ulug‘bek Sunnatov ushlangandi. 

Rashid Qodirov O‘zbekiston prokuraturasini 15 yil davomida boshqargan va 2015 yil aprelida lavozimdan olingandi. 

Keyinroq ushbu ish doirasida yana o‘ndan ortiq kishi qamoqqa olindi. Ular orasida «Toshkentni titratgan prokuror» - Toshkent shahar prokurorining korrupsiya va iqtisodiy jinoyatlar bo‘yicha sobiq o‘rinbosari, «Antibiotik» laqabli adliya maslahatchisi Mirag‘lam Mirzayev va unga yaqin bo‘lgan boshqa prokurorlar ham bor edi.

«Qodirov ishi» ishi doirasida jami 21 kishi qamoqqa olingan.

O‘zbekistonning hozirgi bosh prokurori Otabek Murodov shu yilning iyunida Senatdagi chiqishi vaqtida Rashid Qodirov bilan bog‘liq vaziyat to‘g‘risida gapira turib, qo‘lga olinganlarning barchasi ustidan tergov jarayoni davom etayotganini bildirgandi.

O‘shanda u tergovning maqsadi - qo‘lga olinganlarni qamoqqa tashlash emas, davlatga yetkazilgan zararni undirish ekanini aytgandi.

«Agar qo‘lga olinganlar pullarni qaytarishsa, ular ozodlikka chiqarilishi ham hech gap emas», - degandi u.

Bundan tashqari, shu yilning martida O‘zbekiston Ichki ishlar vazirligi Rashid Qodirovning o‘g‘li Alisherbek Qodirovni qidiruvga bergan. U O‘zbekiston Respublikasi Jinoyat kodeksining 165-moddasi 2-qismi A-bandi (takroran yoki xavfli retsidivist tomonidan sodir etilgan tovlamachilik), 165-moddasi 3-qismi A-bandi (juda ko‘p miqdordagi tovlamachilik), 168-moddasi 3-qismi A-bandi (ko‘p miqdordagi firibgarlik), 168-moddasi 4-qismi A-bandida (juda ko‘p miqdordagi firibgarlik) nazarda tutilgan jinoyatlarni sodir etishda gumonlanmoqda.