U hayotidagi eng muhim golni urolmadi, ammo baribir jahon chempioni bo‘ldi - Mirjalol Qosimov 48 yoshda!

O‘zbek futbolining tirik afsonasi Mirjalol Qosimov bugun 48 yoshni nishonlamoqda. U haqda juda ko‘p maqolalar chop etilgan, teleko‘rsatuvlar efirga chiqqan, hatto kitob yozilgan. Uning futboldagi har bir qadamini muxlislar sinchiklab kuzatib kelishgan. Ammo, faoliyatidagi bir voqeani ko‘pchilik bilmasa kerak. 

1987 yil 25 iyul kuni Kanadaning Toronto shahrida o‘smirlar o‘rtasidagi jahon chempionati finali bo‘lib o‘tdi. Unda Nigeriya va SSSR terma jamoalari bahs olib borishdi. 17 yoshli Mirjalol Qosimov bu o‘yinda ishtirok etib, juda muhim vaziyatda darvozani ishg‘ol etolmadi. Futbolchi bu haqda Axbor Imomxo‘jayevning «O‘zbegimning Mirjaloli» kitobida gapirib berdi.

«O‘yin boshlanishi bilan raqib hujumga o‘tdi. Ular to‘pni nazorat qilishga asosiy e'tiborni qaratdilar. Biz esa qarshi hujumda harakat qila boshladik. Shunday hujumlarning birida tezkor gol urdik. 6-daqiqada Yuriy Nikiforov Nigeriya darvozasini ishg‘ol etdi.

Ammo, quvonchimiz uzoqqa cho‘zilmadi. Oradan besh daqiqa o‘tgach, Fetu yaqin masofadan darvozamizga gol urdi - 1:1. 

Ikkinchi bo‘limda tashabbus biz tomonda bo‘ldi. Ammo shu kuni barcha himoyada xato qilmaslikka harakat qildi. Natijada, o‘yinda hisob o‘zgarmay, penaltilar seriyasigacha yetib bordi.

Penaltilar seriyasini biz boshlab berdik. Bejyenar ilk zarbani golga aylantirdi - 1:0. Nigeriyalik futbolchining zarbasini darvozabonimiz Okroshidze qaytara oldi. Matveyev hisobni 2:0 ko‘rinishiga keltirdi. Eke gol urib, farqni qisqartirdi - 2:1.

To‘p tepish navbati menga keldi. Darvozabonni chalg‘itishga harakat qildim, ammo tepgan to‘pim darvoza ustuni yonidan o‘tib ketsa bo‘ladimi... Vaholanki, aniq yo‘llaganimda, darvozabon uni ushlab qololmasdi, chunki, boshqa burchakka sakragan edi... 

Shundan so‘ng, nigeriyalik futbolchi ham penaltida adashdi. Nikiforov esa sovuqqonlik bilan gol urib, g‘alabamizni ta'minladi» - deb Mirjalol Qosimov so‘zlarini keltirmoqda Axbor Imomxo‘jayev. 

Penaltilar seriyasida 3:1 hisobida g‘alaba qozongan SSSR terma jamoasi jahon chempioni bo‘ldi. Mirjalol Qosimov taqdirlash marosimida jahon kubogini boshi uzra ko‘tardi. 

Mirjalol Qosimov jahon chempionatida g‘alaba qozongan o‘zbek futboli tarixidagi yagona o‘yinchidir. U futbolchi sifatida kattalar o‘rtasidagi jahon chempionatida ishtirok etolmadi, bu unga armon bo‘lib qoldi. Murabbiy sifatida ishtirok etish uchun esa unda hali imkoniyat bor.

Tug‘ilgan kuningiz muborak bo‘lsin!