"O‘zekspomarkaz"da hojatxona ishlab chiqaruvchi besh kompaniya taqdimoti o‘tkaziladi

Sir emaski, bugungi kunda O‘zbekistonda turizmni rivojlantirish yo‘lida mamlakatda hojatxonalar qurish masalasiga katta e'tibor qaratilmoqda. 3-5 oktabr kunlari Toshkent shahrining "O‘zekspomarkaz" maydonida bo‘lib o‘tuvchi "Ipak yo‘li turizmi" XXIV Toshkent xalqaro turistik yarmarkasi doirasida alohida stendda hojatxona ishlab chiqaruvchi besh kompaniya taqdimoti bo‘ladi. Turizmni rivojlantirish davlat qo‘mitasi raisi o‘rinbosari Abdulaziz Akkulov 24 sentabr kuni  yarmarkaga bag‘ishlangan matbuot anjumanida KUN.UZ muxbiriga shu haqida ma'lum qildi.

"Kompaniyalar vakillari o‘z mahsulotlarini O‘zbekistonning barcha hududlardan kelgan bozor mutasaddilari, yo‘l yoqasidagi kompleks majmualari va istirohat bog‘lari rahbarlari va umuman yirik savdo tashkilotlari vakillari e'tiboriga taqdim etishadi. Ko‘rgazmaning hovli qismida ularning namunalari o‘rin olishi rejalashtirilgan. Yarmarka doirasida ushbu kompaniyalar bilan shartnomalar imzolanishi kutilmoqda", - deydi u.

Shuningdek, "Ipak yo‘li turizmi" yarmarkasida turizm sohasi vakillariga o‘z mahsulotlarini taqdim etmoqchi bo‘lgan kompaniyalarga maydon yaratiladi. O‘zbekistonning sayyohlik salohiyatini ochib beruvchi guidebook'larni yaratish tashabbusi bilan chiqqan kompaniya, futbolkalar, tarixiy obidalar ramzlari tushirilgan mahsulotlar va qandolatchilik mahsulotlari ishlab chiqaruvchi kompaniyalar uchun ham maxsus burchaklar ajratiladi.

Bundan tashqari, XXIV Toshkent xalqaro turistik yarmarkasiga Gretsiyadan 15 ta turoperator alohida jalb qilingan.

"Hozir Afina-Toshkent-Afina reysini ochishga doir ishlar olib borilmoqda. Yarmarka doirasida Gretsiya delegatsiyasi vakillari bilan B2B formatidagi uchrashuvlar tashkil qilinadi va kelgusi yillar uchun tegishli shartnomalar imzolanadi", - deya ma'lum qildi Abdulaziz Akkulov.