Nur.kz yangiliklar sayti jurnalistini o‘ldirganlikda gumon qilingan shaxs ushlandi 

Qozog‘istonning nur.kz yangiliklar sayti jurnalisti Irina Beketovani o‘ldirganlikda gumon qilingan shaxs qo‘lga olindi. Bu haqda Qozog‘iston ichki ishlar vazirligi vakili Almas Sadubayev ma'lum qildi. 
 
Avvalroq 37 yoshli jurnalist Ostonada o‘ldirib ketilgani, qotillikda 34 yoshli erkak gumon qilinayotgani va uni ushlash bo‘yicha choralar ko‘rilayotgani ma'lum qilingandi. Ayolning jasadi do‘pposlanganlik alomatlari bilan uyi pod'yezdida aniqlangan.     

“Gumonlanuvchi qarshilik ko‘rsatmadi, qochishga urinmadi, politsiyachilar uni qo‘qqisdan ushlashgan”, deb qo‘shimcha qilgan Sadubayev.

Gumonlanuvchi Anatoliy Guseynov jurnalist bilan yaqin munosabatlarda bo‘lgan, biroq rasman turmush qurmagan bo‘lgan. Ularning ikki nafar umumiy farzandi bo‘lgan. Ta'kidlanishicha, Guseynov Beketovani boshqa erkak bilan pod'yezdda uchratganda, rashk qilib ayolni o‘ldirgan.

Marhumaning ortidan 4 nafar farzandi qolgan.