«DXR»dagi jangovar harakatlarda ishtirok etgan shaxs O‘zbekistonga ekstraditsiya qilinadi

«Donetsk xalq respublikasi»dagi jangovar harakatlarda ishtirok etgan ko‘ngilli askar, «Lochin» laqabli Ruslan Bobojonov 28 sentabr kuni Nijniy Novgorod aeroportida qo‘lga olindi.

Endi u ekstraditsiya qilinishi mumkin. Bu haqda Federal yangiliklar agentligiga Donbassning Harbiy jasorat muzeyi rahbari German Vladimirov ma'lum qildi.

«Ruslan «DXR» pasportiga ega, bundan tashqari u - O‘zbekiston fuqarosi. 2014 yilda u yurak amri bilan Donbassdagi tinch aholini himoya qilish uchun keldi. U 2014 yilda eng qaynoq nuqtalar - ham Saur-Mogila, ham Donetsk aeroportida jang qilgan «Vostok» batalonida bo‘lgan. Nijniydagi hamkasblarim ogohlantirildi. Ular hozir uning oldiga advokat bilan borishmoqda. Biz bu ishni zudlik bilan qat'iy nazoratga oldik», - deya ta'kidlab o‘tdi German Vladimirov.

Ma'lumotlarga ko‘ra, o‘zbekistonlik Nijniy Novgoroddan Rostov-Donga uchib ketishi kerak edi, ammo u Interpol murojaati bilan transport politsiyasi tomonidan ushlandi.

Eslatib o‘tamiz, O‘zbekiston Respublikasi Jinoyat kodeksining 154-moddasi - «Yollanish» bo‘yicha yollanish, ya'ni nizolashayotgan davlatning fuqarosi yoki harbiy xizmatchisi hisoblanmagan yoxud nazorat qilinib turgan nizolashayotgan davlat hududida doimiy yashamaydigan yoki hech qanday davlat tomonidan qurolli kuchlar tarkibida rasmiy topshiriqni bajarish vakolati berilmagan shaxsning moddiy manfaatdorlik yoki boshqa biron shaxsiy manfaatni ko‘zlab, o‘zga davlat hududida yoki uning tarafini olib qurolli to‘qnashuvda yoxud harbiy harakatlarda qatnashish uchun yollanishi — besh yildan o‘n yilgacha ozodlikdan mahrum qilish bilan jazolanadi.

Yollanma shaxsni yollash, o‘qitish, moliyalashtirish yoki unga boshqa moddiy ta'minot berish, xuddi shuningdek undan harbiy to‘qnashuv yoki harbiy harakatlarda foydalanish — yetti yildan o‘n ikki yilgacha ozodlikdan mahrum qilish bilan jazolanadi.