Qahramon Aripov Toshkent shahri hokimi o‘rinbosarligidan ketdi

Toshkent shahar hokimining iqtisodiyot va tadbirkorlik masalalari bo‘yicha birinchi o‘rinbosari Qahramon Tursunovich Aripov lavozimni tark etdi. 

Toshkent shahri hokimligi matbuot xizmatidan «Kun.uz»ga tasdiqlashlaricha, endi Sherzod Xadjizadayev Toshkent shahar hokimining iqtisodiy masalalar bo‘yicha o‘rinbosari lavozimini egallagan.

Ko‘p yillar davomida «Trastbank» rahbari bo‘lib ishlagan Sherzod Rafatovich Xadjizadayev 2017 yilning 18 aprelida Prezidentining tegishli farmoniga asosan Markaziy bank raisining o‘rinbosari etib tayinlangandi.

Sherzod Xadjizadayev 1973 yil Toshkent shahrida tug‘ilgan. 1996 yilda Toshkent davlat universitetini, 2001 yilda O‘zbekiston Respublikasi Bank-moliya akademiyasini tamomlagan va bank tizimida faoliyat ko‘rsata boshlagan.

Qahramon Aripov 2007-2016 yillarda «Asaka» davlat-aksiyadorlik tijorat banki boshqaruvi raisi bo‘lib ishlagan. U 2017 yilning oktabrida O‘zbekiston Respublikasi maktabgacha ta'lim vaziri o‘rinbosari lavozimiga tayinlanib, 2018 yilning mayigacha, Toshkent shahri hokimiga o‘rinbosar bo‘lganiga qadar, shu lavozimda ishlagandi.