«Zenit» va «Krasnodar» futbolchilari Aleksandr Kokorin va Pavel Mamayev vaqtincha hibsga olinganidan so‘ng, dastlabki intervyuni berishdi.
Futbolchilarni 10 oktabr kuni kechqurun politsiya mahkamasiga olib kelishgan edi. Shundan so‘ng, so‘roq tungi soat 3-4largacha davom etgan.
Futbolchilar tunni avtozakda o‘tkazishgan. Ularni kechasi shahar aylanishga olib chiqib, tergov xonasiga faqat soat 9:45da qaytarishgan.
«So‘roq tungi soat 3-4gacha davom etdi», — degan Mamayev va tergov harakatlarining tunda o‘tkazilishiga rozi bo‘lganini tasdiqlagan.
«Bunga e'tirozim yo‘q. So‘roq uzoq vaqt davom etdi. Hech narsani yashirmadim. Axir biror narsani inkor qilib bo‘larmidi? Uchta holat bo‘yicha so‘roq qilindim. To‘g‘risini aytsam, o‘zimni juda axloqsiz tutgandim. Hammasiga o‘zimiz aybdormiz. So‘roqdan keyin qon tahlilini topshirdik. Giyohvandlik moddasini iste'mol qilmagandik», — dedi Mamayev.
O‘z navbatida Kokorin tungi so‘roqqa rozilik bermagani, ammo bunga qarshi emasligini aytgan.
«Juda ham oshirib yuborishdi. Biz faqat pivo ichgandik. Hammasi futbol o‘yinidan keyin, mashg‘ulotlar va uyqusiz tundan so‘ng yuz berdi... Poyezdda ham uxlamagandik. Negadir bizni tuni bilan avtozakda shahar bo‘ylab olib yurishdi. Juda ham afsusdaman. Sportni tark etmoqchi emasman, umid qilamanki, hech kim meni chetlashtirmaydi», - degan u.
Shuningdek, Kokorin Minpromtorg mulozimi Denis Pakni stul bilan urganiga izoh bergan.
«U odam meni haqorat qildi, aks holda o‘zimni bunday tutmagan bo‘lardim. Ammo videoda u bilan orani ochiq qilganimiz, oxirida qo‘l berib ko‘rishganimiz ham bor. Buni guvohlar ham tasdiqlashadi» - degan Kokorin.
Hozirda Mamayev uch kishilik xonada saqlanmoqda. Uning qo‘shnilaridan biri ashaddiy retsidivist, ikkinchisi uzoq masofalarga qatnovchi yuk mashinasi haydovchisi. Ularga ham «Bezorilik» moddasi bo‘yicha ayblov qo‘yilgan.
Kokorin ham uch kishilik kameraga qamalgan. Uning hamrohlari ham ayni vaqtda tergov jarayonida. Uning jurnalistlarga aytishicha, tergovchilardan biri Pavel Mamayevni "palid" deya haqoratlagan.
«Moskovskiy komsomolets» jurnalisti Kokoringa:"O‘zingga hujum bo‘lishidan qo‘rqmayapsanmi?"- deya hazilomuz savol bergan va unga hazilomuz javob qaytarilgan. «Qo‘rqishga hojat yo‘q, bu yerda stullar yo‘q, barcha o‘rindiqlar polga mahkamlangan. Agar o‘shanda kafeda ham stullar polga mahkamlangan bo‘lganida, bu ishlar bo‘lmasdi», – degan Aleksandr.
Eslatib o‘tamiz, 8 oktabr kuni har ikki futbolchi Moskvadagi qahvaxonalardan birida Minpromtorg mulozimi Denis Pak va «NAMI» tashkiloti rahbari Sergey Gaysinni do‘pposlashgani tasvirlari tarqalgandi. Bu mojarodan biroz oldin esa futbolchilar «Perviy kanal» boshlovchisi Olga Ushakovaning haydovchisiga hujum qilishgan. Jabrlanganlar turli darajada tan jarohatlari bilan shifoxonaga yotqizilgan. Bu ish yuzasidan Moskva politsiyasi 213-modda (Bezorilik) bo‘yicha jinoyat ishi ochdi va futbolchilarni 48 soatga hibsga oldi.
Ular o‘z aybiga iqror bo‘lgani aytilgan. Har ikki futbolchiga 7 yillik qamoq jazosi tahdid solmoqda.
