Toshkent markazida tomi ochiq uylar. «Charxnovza» mahallasi yomg‘irdan nega qo‘rqadi?

Farovon va to‘kis hayot kechirish uchun har bir inson, har bir fuqaro o‘z kuchini va vaqtini safarbar etadi. Lekin, jamiyatda shunday muammolar borki, bir fuqaroning o‘zi bu muammolarni hal qila olmaydi.

Sayt ijodiy guruhi navbatdagi murojaat izidan Toshkent shahar Shayxontohur tumaniga yo‘l oldi. Bu safar murojaat odatdagi kabi ko‘pqavatli uylarda istiqomat qiluvchi fuqarolar tomonidan uy-joy shirkatlari ustidan emasdi. Bu safar murojaatchi shirkatning o‘zi edi.

«Ozod Vatan kommunalchi» uy-joy shirkati rahbari Nilufar Umarova ushbu tumandagi «Charxnovza» mahallasida ro‘y berayotgan taajjubli ishlar haqida so‘zlab berdi. 

«Men shirkat rahbari sifatida 2013 yildan beri ishlab kelaman. Hududimda 22ta ko‘pqavatli uylar bor. Bu yil bizning mahalla «Obod mahalla» dasturiga tushgan edi. May oyidan bu dasturga tayyorgarlik olib borildi. Ushbu dastur bo‘yicha tom qismlari ham yangilanib, tunuka bilan qoplanishi lozim edi. Shirkatga tegishli uylarning tom qismini o‘tgan yili yumshoq qoplama bilan qoplagan edik. Buning uchun kredit olib to‘lab kelayotgandik. Ammo, hokimiyat vakillari dastur bo‘yicha qoplama temir tunukaga almashtirilishi lozimligini aytishdi. Qolaversa, tomni qurish boshlanganidan so‘ng bizga bu bo‘yicha mablag‘ni kredit asosida shirkat to‘lashi lozim, deyishdi. Bu biz uchun kutilmagan sovg‘a bo‘ldi. Shundan keyin kredit oldik. Hokimiyat pudratchi sifatida «Kosogoron Innovatsion qurilish» MChJni taklif qildi. Shundan beri oradan 3-4 oy o‘tdi. Bu orada hududimizga davlat rahbari ham tashrif buyurdi. Ishlar qilinmadi demayman. 14ta uydan 10tasining tomi yopildi. Lekin, 4ta uy hamon ochiq holatda. Yaqinda yomg‘ir mavsumi boshlanadi. Dodimizni kimga aytishni bilmaymiz», - deydi alamzada shirkat rahbari.

Vaziyat juda chigal holatda edi. Bir tarafdan kreditni to‘lash kerak, boshqa tarafdan tom hali yopilmagan. Aholi esa norozi, axir ular to‘lov qilishmoqda. To‘lov nima uchun – tayyor tomni ochib, chala qoldirib ketishgani uchunmi?

Aholi bilan uchrashuvda vaziyat yanada chigallashdi. Barchaning ko‘zida hadik edi. Odamlar osmonga xavotir bilan tikilishardi. Osmonni qora bulut to‘ldirib kelardi.

Avvaliga aholi jurnalistlarni hukumat vakillari deb o‘ylashdi va savollar yog‘dirishdi: «Bu tomi bitmagan 4ta uy boshqalaridan nimasi bilan farq qiladi?», «Nega biz tomsiz qoldik?», «Bu ishlar qachon oxiriga yetkaziladi?».

Ikkinchi taraf - pudratchi bilan bog‘lanishga urinishlar besamar ketdi - u telefon qo‘ng‘iroqlariga javob bermadi.

Shundan so‘ng tuman hokimiyatiga yo‘l oldik. Shirkat rahbarining so‘zlariga ko‘ra, hokimiyat vakillari va shaxsan hokimning o‘ziga bir necha marotaba murojaat qilingan, biroq arizalar javobsiz qolgan. Bu holatda oldingi rahbariyat «Jismoniy va yuridik shaxslarning murojaatlari to‘g‘risida»gi Qonunning 18, 24 va 28-moddalariga rioya etmaganini ko‘rish mumkin.

Shayxontohur tuman hokimiyatida ijodiy guruhni hokim yordamchisi Elshod Husanov kutib oldi. Vaziyatni eshitganidan so‘ng, u bu masala yuzasidan mas'ul shaxs bilan uchrashtirishini aytdi - hokim bilan emas. Hokim investorlar bilan o‘tkazilayotgan uchrashuvda ekani, shu sababli kutib turish kerakligi aytildi. Bu orada hokimiyatning kommunal ishlar inspeksiyasi rahbari Muhitdin To‘rayev keldi va hokimning oldiga birga kirishini bildirdi.

Ma'lum vaqtdan so‘ng, hokimning o‘zi ham keldi. Shirkat rahbari, hokimiyat vakillari bilan birgalikda hokim kabinetida suhbat boshlandi. Hokim yaqinda tayinlangani (Shuhrat Sanjarovich Muhammadxonov joriy yilning avgustida tuman hokimi sifatida ish boshlagan), hali qilinishi kerak bo‘lgan ishlar juda ko‘pligini, shuningdek bu ishlardan xabari borligini aytib o‘tdi. Hokimiyat vakili Muhitdin To‘rayev ham bu ishlarni shaxsan nazorat ostiga olishini, pudratchi bilan gaplashishini qo‘shimcha qildi. Hokim bilan mahalla hududiga qaytdik.

Tomi yopilmagan uylar oldiga borganimizda, bu yerda bizni qurilish pudratchisi va sektor rahbari kutib turgan edi. Pudratchini savolga tutdik.

«Men ham qo‘limdan kelganicha ishlayapman. Bu hududdagi bolalar bog‘chasida qurilish qilingan. Bunga ketgan mablag‘ dastur doirasida byudjyetdan berilishi kerak edi. Uy-joylar esa fuqarolar tomonidan kreditlar asosida ta'mirlanishi lozim bo‘lgan. Kreditlar o‘tkazilgan, lekin bu pullarni avvalgi hokimiyat vakillari pullarni bog‘cha qurilishiga sarflab turishim, bog‘chani puliga tomlarni yopishimni aytishgan. Bunga sabab qilib, hududga prezident tashrif buyurishi, tashrifgacha ulgurish kerakligini aytishgandi. Lekin pul hali tushmadi. Hammasini o‘zimning hisobimdan qilyapman. Hafta oxirigacha tomlar yopiladi. Bugun bitta tomni yopib tugatamiz», deya va'da berdi u.

Shundan so‘ng, tuman hokimi ham vaziyatni shaxsan nazoratiga olishini, qurilish ishlari albatta oxiriga yetkazilishiga va'da berdi.

Shu orada hokimiyat vakillari Moliya vazirligi tomonidan bolalar bog‘chasi uchun pul kelib tushgani haqida xabar qilishdi.

Pudratchi va hokimiyat vakillarining va'dalaridan keyin guruh ortga qaytdi. Umid qilamizki, endi «Charxnovza» mahallasi aholisi yomg‘irlarni xavotir bilan qarshilamaydi.