AQSh prezidenti Donald Tramp 2020 yilgi saylov kampaniyasiga 100 mln dollardan ko‘proq mablag‘ yig‘a oldi. Bu haqda Federal saylov komissiyasi ma'lumotlariga iqtibos keltirgan holda CNN telekompaniyasi ma'lum qildi.
Joriy yilning iyul-avgust oylarida Tramp saylov kampaniyasini o‘tkazish qo‘mitasi va Respublikachilar partiyasi milliy qo‘mitasi yordamida 18 mln dollar yig‘a olgan. Shu tariqa, Tramp keyingi saylovi uchun yig‘gan umumiy mablag‘ 106 mln dollarga yetgan. Ta'kidlanishicha, xayriya qiluvchilarning 98 foizi 200 dollardan ko‘p pul ajratishmagan.
AQShning avvalgi prezidenti Barak Obama qayta saylanishi uchun mablag‘larni prezidentligining 3 yilidan keyin yig‘a boshlagan. Trampning esa Oq uyga rahbarlik qilayotganiga hali 2 yil ham bo‘lmadi, biroq u keyingi saylovlar uchun mablag‘ yig‘ishni allaqachon boshlab yuborgan.
