Turkiyaning Istanbul shahrida Turkiya, Fransiya, Germaniya va Rossiya yetakchilari ishtirokida Suriya mojarosini tartibga solish masalalariga bag‘ishlangan to‘rt tomonlama muzokaralar bo‘lib o‘tdi. Mazkur sammit Suriya masalasiga bag‘ishlab bunday formatda o‘tkazilgan ilk uchrashuv bo‘ldi.
Tadbir mezboni Turkiya prezidenti Rajab Toyyib Erdo‘g‘an to‘rt yetakchi ishtirokidagi muzokaralar yakunini sermahsul va konstruktiv deb atadi, deb yozadi Anado‘lu agentligi.
Erdo‘g‘anning ta'kidlashicha, Suriyadagi mojaroni bartaraf etish nafaqat ostona jarayoni doirasida, shuningdek kengroq formatda hal qilinishi kerak va bugungi sammit buning yaqqol dalili bo‘la oladi.
Erdo‘g‘an Istanbul sammiti qatnashchilari Suriya xalqining qonuniy talablarini hisobga olgan holda ushbu mamlakatda barqarorlikka erishish va siyosiy murosaga kelish yo‘llarini muhokama qilishganini ta'kidladi. “Fransiya va Germaniyaning ishtiroki Ostonada boshlangan muzokaralar tufayli boshlangan ijobiy jarayonlar uchun salmoqli hissa qo‘shadi”, — degan Turkiya prezidenti.
To‘rt davlat yetakchilari ikki tomonlama hamkorlikni kuchaytirish va xalqaro darajada o‘zaro hamjihatlikni mustahkamlashga tayyor ekanliklarini bildirishdi.
Erdo‘g‘anning so‘zlariga ko‘ra, Suriyadagi mojaroning avj olishiga asosiy sabab jahon hamjamiyatining vaziyatga o‘ta beparvo munosabati bo‘lgan. Jahon hamjamiyatining loqaydligi Suriyadagi tanazzulning yanada chuqurlashishi va mojaroning umumbashariy muammo tusini olishiga sabab bo‘ldi, degan Turkiya yetakchisi.
Uning qayd etishicha, ko‘plab davlatlar qachonki fojia oqibatlari ularning chegarasigacha borib yetgachgina Suriya mojarosi tahdidlarining miqyosini anglab yetishgan.
Turkiya prezidenti Suriyadagi mojaroni harbiy yo‘l bilan hal qilib bo‘lmasligiga urg‘u berdi.
Tomonlar Suriyada Konstitutsiyaviy kengashni zudlik bilan tuzish kerakligi borasida yakdil to‘xtamga kelishgan. Bunday organ bir yil ichida shakllantirilishi mumkin.
