Sog‘liqni saqlash vazirligi: Chilonzor tumanidagi fojiaga is gazidan o‘tkir zaharlanish sabab bo‘lgan

Sud-tibbiy espertiza natijalariga ko‘ra, 2018 yil 31 oktabr kuni Toshkent shahar Chilonzor tumani, Dilxush ko‘chasi 37-uyda istiqomat qiluvchi fuqaro A.Akbarov xonadonida ro‘y bergan fojiali holatga taom emas, balki is gazidan o‘tkir zaharlanish sabab bo‘lgan. Bu haqda Sog‘liqni saqlash vaziri o‘rinbosari, Respublika bosh Davlat sanitariya vrachi Saidmurod Saidaliyev ma'lum qilmoqda.

Avval xabar qilinganidek, mazkur xonadon egasi Alisher Akbarovning 42 yoshli rafiqasi Umida Xaitova 2018 yilning 30 oktabr kuni soat 20:00 atrofida uyi yaqinida joylashgan 16-shahar kasalxonasi qarshisidagi milliy taomlar kafesidan besh dona sixga tortilgan qiyma kabob, tandir non va to‘g‘rab, sirka sepilgan piyoz sotib olgan.

U kabobni uyda, soat taxminan 20:30da farzandlari bilan birgalikda iste'mol qilgan. Onaning so‘zlariga ko‘ra, kabobda noxush hid va ta'm bo‘lmagan.

Soat 23:30larda bolalar uyning ikkinchi qavatidagi xonaga chiqib, uxlashgan. Ularda hech qanday kasallik belgilari kuzatilmagan. Taxminan soat 23:30larda U.Xaitovaning boshi qattiq og‘rigan, ko‘ngli aynigan va ko‘p marta qayt qilgan. Xonadon egasi A.Akbarov bu vaqtda uyda bo‘lmagan, taxminan soat 24:00da uyga qaytgan. Turmush o‘rtog‘ining sog‘lig‘i yomonlashgani to‘g‘risida tez tibbiy yordam xizmatiga murojaat qilishmagan. Er-xotin binoning birinchi qavatida uxlashgan.

2018 yil 31 oktabr tonggi soat 4 larda U.Xaitova ikkinchi qavatdagi farzandlari uxlayotgan xonani ochib ko‘rganda farzandlari og‘zidan ko‘pik chiqib, behush holda yotganini ko‘rgan va tez tibbiy yordam xizmatiga murojaat qilgan. Soat 04:30da tez tibbiy yordam mutaxassislari kelib, ular tomonidan U.Xaitovaning qizlari Aziza Akbarova (1996 yil), E'zoza Akbarova (2001 yil), Iroda Akbarova (2003 yil) va o‘g‘li Farrux Akbarov (2012 yil)da biologik o‘lim holati qayd etilgan.

Sog‘liqni saqlash vazirligi matbuot xizmati «Kun.uz»ga xabar qilishicha, ayni paytda is gazidan yengil darajada o‘tkir zaharlangan U.Xayitovaga Respublika Shoshilinch tibbiy yordam ilmiy markazida tibbiy yordam ko‘rsatilmoqda, uning ahvoli qoniqarli.

Ma'lumot uchun, ushbu xonadon egalari Dilxush ko‘chasi 37-uydagi yangi qurilgan 3 qavatli binoga yaqinda ko‘chib o‘tishgan. Uy yerto‘lada o‘rnatilgan, tabiiy gazda ishlaydigan isitish qozoni orqali isitiladi.