Kattaqo‘rg‘onda is gazidan zaharlanish oqibatida bir oilaning ikki a'zosi vafot etdi

Samarqand viloyati, Kattaqo‘rg‘on tumani, “Kattako‘rpa” MFY, Kattako‘rpa qishlog‘ida yashovchi Azizjon Eshmurodov va uning turmush o‘rtog‘i Mahliyo Eshmurodova (Xalilova) joriy yilning 7 noyabr kuni is gazidan zaharlanib vafot etgan. KUN.UZ voqeaga oydinlik kiritish maqsadida viloyat Favqulodda vaziyatlar boshqarmasi bilan bog‘landi.

Ma'lumotlarga ko‘ra, 7 noyabr kuni, soat 19:00larda Samarqand viloyati IIB navbatchilik qismidan viloyat FVBga chaqiruv kelib tushgan. Kattaqo‘rg‘on tumani, “Kattako‘rpa”  MFY, Kattako‘rpa qishlog‘ida yashagan fuqaro Azizjon Eshmurodovga tegishli xonadonning yotoqxonasida o‘rnatilgan nostandart gaz isitish pechida ushbu yotoqxonaning yonida joylashgan oshxonadagi 50 litr hajmli maishiy gaz ballonidan devorni teshish yo‘li bilan rezina shlang orqali isitish pechiga ulab foydalanilgani aniqlangan.

“Isitish pechining tutun chiqish mo‘risi qo‘lbola usulda yasalgan, ochish yoki yopish maqsadida o‘rnatilgan 10x15 sm hajmli temir tunukasining (zaslonka)si yopiq holatda qoldirilgan. Shuningdek, isitish pechida yongan gazning tutuni mo‘rikondan chiqmasdan, xonada to‘planishi oqibatida Eshmurodov Azizjon Shuhratovich va turmush o‘rtog‘i Eshmurodova (Halilova) Mahliyo Daminjon qizi voqea joyida vafot etgan”, deyiladi FVB taqdim etgan ma'lumotda.

Kuz-qish mavsumi boshlanishi bilan O‘zbekistonning turli viloyatlarida is gazidan zaharlanish va buning oqibatida jabrlangan, ayrim hollarda, halok bo‘lganlar soni ortadi. Soha vakillari buni gaz uskunalaridan noto‘g‘ri foydalanish deb talqin etishsa, aholi uyini isitish masalasida ilojsizlikda qolishayotganini aytadi.

Jumladan, joriy yilning 18 oktabr kuni Toshkent viloyati Yangiyo‘l tumani ikki fuqaro (er-xotin), 28 oktabr kuni Farg‘ona viloyati Rishton tumanida ham ikki kishi, 3 noyabr kuni Toshkent shahar Yunusobod tumanida baxtsiz voqea tufayli uch kishi hayotdan ko‘z yumgan edi.

Rasmiy ma'lumotlarga ko‘ra, gaz asbob-uskunalaridan noto‘g‘ri foydalanish hamda chaqnash va yong‘in natijasida joriy yilning 9 yarim oyi davomida Samarqand viloyatida 12 nafar, Surxondaryo viloyatida 7 nafar, Toshkent viloyatida 6 nafar fuqaro vafot etgan. Jumladan, 2018 yilning 9 oyi davomida sodir bo‘lgan baxtsiz hodisalarga ko‘ra, gaz va havo aralashmasi bilan bog‘liq chaqnashlar 28 marotaba, maishiy gaz ballonlari nosozligi sabab 11 marotaba is gazi sodir bo‘lishi natijasida 30 kishi zaharlangan.