2019 yilda Yevroosiyo uchun global tahdidlar ma'lum qilindi

Xalqaro ekspertlar «2019 yilda Yevroosiyo uchun global tahdidlar reytingi» tadqiqotini taqdim etishdi. Taqdimot 12-13 noyabr kunlari Qozog‘iston poytaxtida bo‘lib o‘tayotgan, dunyo mamlakatlaridan yetakchi ekspertlar, siyosatchilar hamda diplomatlarni birlashtirgan siyosiy forum shaklidagi xalqaro munozaralar maydonchasi - «Ostona klub» IV yig‘ilishi doirasida o‘tkazildi.

Tadqiqotda 30dan ortiq ekspert va siyosatchilar ishtirok etdi, shuningdek, so‘rovnoma uslubidan foydalangan holda 60 mamlakatdan 1000dan ortiq respondent bilan suhbat o‘tkazildi.

Reytingni yaratishdan maqsad - ham Yevroosiyo mintaqasida, ham butun dunyoda dolzarb geosiyosiy va geoiqtisodiy jarayonlarni baholash.

«Bugungi kunda savdo va sanksiyalar urushi, ortib borayotgan qurollanish sharoitida, nizolarni hal qilish uchun muhim xalqaro institutlar, jumladan, BMT va JST tahdid ostida qoldi. Kuzatilayotgan jarayonlar global xavfsizlik tizimi inqirozi ortayotganidan darak beradi, bu eng salbiy oqibatlarga olib kelishi mumkin. Bunday sharoitlarda, bizning fikrcha, Yevroosiyo global chegarada turibdi, bunda u yoki birlashishi, yoki global mojaro maydoniga aylanib ketishi ehtimoli bor. Bu holatga qanday yechim topilishi yaqin yillarda ma'lum bo‘ladi. Shu nuqtai nazardan, biz tayyorlagan tahdidlar reytingi ushbu muloqot mavzusi bo‘lishi kerak bo‘lgan muammolarni belgilab berishga qaratilgan», - deya ta'kidlab o‘tdi Qozog‘iston Birinchi prezidenti fondi huzuridagi Jahon iqtisodiyoti va siyosati instituti direktori Yerjan Saltibayev.

Tahlilchilarning fikricha, mintaqadagi asosiy geosiyosiy tahdidlar quyidagilar:

- Xitoy va AQSh o‘rtasidagi qarama-qarshilikning kuchayishi,
- keng ko‘lamli savdo urushlari,
- Yaqin Sharqdagi katta urush,
- Rossiya va G‘arb o‘rtasidagi munosabatlarning yanada yomonlashishi,
- Yevroosiyodagi «qaynoq nuqtalar»da faollikning tiklanishi, 
- separatizm va etno-konfessional ziddiyatlarning o‘sishi,
- ekologik va suv muammolarining kuchayishi,
- kibertahdidlarning kuchayishi va evolyutsiyasi,
- yangi qurollanish poygasining boshlanishi,
- yirik yadroviy va texnogen falokatlar xavfi.

Ma'lumot uchun: Astana Club ishida dunyoning Avstraliya, Afg‘oniston, Belgiya, Buyuk Britaniya, Misr, Hindiston, Indoneziya, Eron, Ispaniya, Italiya, Xitoy, Qirg‘iziston, Norvegiya, Rossiya, AQSh, Xorvatiya, Shvetsiya va Yaponiya kabi 30 davlatidan kelgan taxminan 50 spiker ishtirok etmoqda.