O‘zbekiston Markaziy Osiyodagi ta'lim xabiga aylanish sari navbatdagi qadamni qo‘ymoqda

23 noyabr kuni Toshkent Davlat iqtisodiyot universitetida Scopus ilmiy-tahliliy ma'lumotlar bazasi versiyasiga ko‘ra, O‘zbekiston olimlarini taqdirlashga bag‘ishlangan tantanali marosim bo‘lib o‘tadi. Tadbir Oliy va o‘rta maxsus ta'lim vazirligi tomonidan Niderlandiyaning Elsevier kompaniyasi bilan hamkorlikda tashkillashtirilgan.

Bosh vazir o‘rinbosari Aziz Abduhakimovning KUN.UZ muxbiriga ma'lum qilishicha, mazkur tadbir O‘zbekistonning Markaziy Osiyo ta'lim xabiga aylanishi tomon qo‘yilgan navbatdagi qadamdir.

“Ushbu tadbir O‘zbekistonni Markaziy Osiyodagi ta'lim xabiga aylantirish sari qo‘yilgan navbatdagi muhim qadam hisoblanadi. Ilk forum davomida Scopus tizimi bo‘yicha eng yuqori ko‘rsatkichlarni qayd etgan olim va pedagoglarimiz taqdirlanadi. Shu o‘rinda ta'kidlash lozimki, QS va Times Higher Education kabi jahon tan olgan reyting agentliklari aynan Scopus ma'lumotlaridan foydalanadi. Shu nuqtai nazardan, biz O‘zbekistonning oliy ta'lim muassasalari QS’ning eng yaxshi TOP-500 universiteti ro‘yxatiga kirish imkoniga ega bo‘lishi ustida ish olib boryapmiz, bu yo‘nalishda zarur hamkorlik aloqalari yo‘lga qo‘yilgan bo‘lib, kelajakda ular yanada rivojlantiriladi”, - deydi Abduhakimov.

Tantanali marosimda respublika vazirlik va idoralar vakillari, shuningdek QS va Times Higher Education kabi yetakchi reyting agentliklari direktorlari, 5-100 loyihaviy ofis rahbari Nadejda Ploxina, Elsevier kompaniyasi rahbariyati hamda OTMlarning rektor va prorektorlari ishtiroki kutilmoqda.

Tadbir davomida olimlar uchun maqolalar yozish, ilmiy jurnallar indeksatsiyasi va xalqaro reytinglarga kirish metodologiyasini o‘rgatishga oid mahorat darslarini o‘z ichiga olgan Birinchi ilmiy forum o‘tkazilishi rejalashtirilmoqda.

Ta'kidlash joizki, 2018 yilning 23 martida Oliy va o‘rta maxsus ta'lim vazirligi va Elsevier kompaniyasi o‘rtasida «Ilm-fan-2020» milliy strategik shartnomasi imzolangan. Mazkur kelishuv O‘zbekistondagi oliy ta'lim muassasalarining ilmiy salohiyatini oshirishga hamda ularning jahonning yetakchi reyting agentliklari tomonidan e'tirof etilishiga yo‘naltirilgan.