Rossiya aholisi keyingi o‘n yil ichida ilk bor kamaydi

2018 yilning yanvar-oktabr oylarida Rossiya aholisi soni 78,7 ming kishiga kamaydi, deb ma'lum qildi Rosstat. Aholining tabiiy kamayishi o‘tgan 10 oy davomida 180,5 ming kishini, migratsion o‘sish esa 101,8 ming kishini tashkil qilgan. Shu tarzda, migratsion oqim aholi kamayishi o‘rnini atigi 56,4%ga to‘ldirgan.

Bu Rossiyada keyingi 10 yil ichida aholi sonining ilk bor kamayishidir. So‘nggi marta bunday holat 2008 yilda qayd etilgan: migratsion oqimning tabiiy kamayish o‘rnini to‘ldira olmaganligi natijasida aholisi soni 10,3 ming kishiga kamaygan.

Qayd etilishicha, 2018 yilda migratsion o‘sish 2017 yilga nisbatan 43%ga kamaygan. Rossiyaga Ukrainadan migrantlar kelishi 74%ga, O‘zbekistondan 70%ga va Qirg‘izistondan 40%ga qisqargan. 

Aholi tabiiy kamayishining asosiy sababi tug‘ilishning kamayishi bo‘lgan. Yanvar-oktabr oylarida tug‘ilish 1,352 mln nafarni tashkil etgan bo‘lib, bu o‘tgan yilga nisbatan 66 mingtaga kamdir.