O‘zbekiston terma jamoasi va Xitoyning «Shanxay SIPG» klubi yarimhimoyachisi Odil Ahmedov 2018 yilda mamlakatimizning eng yaxshi futbolchisi deb topildi va o‘z rekordini oshirdi.
Shu paytgacha 31 yoshli futbolchi 2009, 2011, 2014 – 2016 yillarda jami 5 marta bunday e'tirofga sazovor bo‘lgandi. Bundan tashqari, yilning eng yaxshi futbolchisini aniqlash maqsadida o‘tkazilgan so‘rovnomada 3 marta 2-o‘rinni va 1 marta 3-o‘rinni ham qo‘lga kiritgan.
O‘zbekiston terma jamoasining sobiq futbolchilari Mirjalol Qosimov va Maksim Shatskix o‘z faoliyatida 4 martadan yilning eng yaxshi futbolchisi bo‘lishgan. Server Jyeparov va Pavel Bugalo 2 marta shunday e'tirofga sazovor bo‘lishgan.
Shuningdek, Andrey Akopyants, Valeriy Kechinov, Oleg Shatskix, Sanjar Tursunov va Marat Bikmayev 1 martadan yilning eng yaxshi futbolchisi deb topilishgan.
Eslatib o‘tamiz, Odil Ahmedov 2018 yilda «Shanxay SIPG» klubi bilan Xitoy chempioni bo‘lgan edi.
