​Yana “zapravka”da gaz narxi ko‘tarildi. Farg‘ona vodiysi “zapravka”larida navbat yo‘q, bosim baland, ammo...

Mana qariyb, uch hafta mobaynida vodiy viloyatlaridagi avtomobillarga gaz qo‘yish shoxobchalaridagi uzundan-uzoq navbatlar bilan bog‘liq muammolar haqida juda ko‘p maqolalar e'lon qildik.

Ma'lumki, har yili sovuq fasl kelib, harorat minus daraja tomon tushganida, tabiiy gaz bosimi pasayib vodiy viloyatlari aholisi uchun jiddiy qiyinchiliklar yuzaga keladi. Bu yil mazkur muammoli holat ommaviy axborot vositalarida keng muhokamalarga sabab bo‘ldi.

Dekabr oyining so‘nggi kunida “O‘ztransgaz” AJ raisi Bahodir Eshmuratov Andijon, Namangan va Farg‘ona viloyati aholisi 2019 yilni issiq xonadonlarda kutib olishi haqida xushxabarni e'lon qildi.

Darhaqiqat, vodiyning uch viloyatida yashovchi aholi vakillari tabiiy gaz bosimi sezilarli darajada ko‘tarilganini bildirdilar.

Ayniqsa, avtomobillarga siqilgan gaz quyish shoxobchalarida bosim ko‘tarilgani yanada aniqroq namoyon bo‘lgani bor gap. Chunki, metan “zapravka”lari atrofida navbatlar deyarli yo‘qolgan. Kechki soat 20da berkitilayotgan shoxobchalardan cheklov olib tashlanib, endi maskanlar uzluksiz faoliyat yuritmoqda.

Biroq, “zapravka”lar bosim bilan birgalikda gaz narxini ham ko‘tarib olgani taajjubli holat. Bu haqda vodiyning turli burchaklaridan murojaatlar kelib tushmoqda. “Farg‘ona viloyati, Quva tumanidagi gaz “zapravka”sida navbat yo‘q. Lekin, narx birdaniga 400 so‘mga oshganiga hayron bo‘ldik. Metan gaz narxi 1900 so‘mdan 2300 so‘mga chiqqan”, – deya yozadi quvalik o‘quvchimiz. Xuddi shunday murojaatlar Andijon viloyatidan ham keldi.

Vodiyni aylanib, metan gaz quyish shoxobchalarida bo‘ldik. Andijon shahriga kiraverishdagi xalq “strelka” deya atovchi shoxobchada metan gaz narxi 2200 so‘m ekan.

Uyshin qishlog‘idagi maskanda esa 2100 so‘mdan quyilmoqda.

Namangan viloyatida faoliyat yuritayotgan deyarli barcha metan “zapravka”larida narx barqaror 1900 so‘m. Bunga Uychi tumanidagi shoxobchada ham guvoh bo‘ldik. Namangan shahri atrofidagi “zapravka”larda ham bir xil 1900 so‘mlik narx saqlanib qolibdi.

Shuni alohida aytib o‘tish kerakki, vodiydagi “zapravka”larda kerakli savollaringizga javob olishning iloji yo‘q. Sababi, shoxobchalarda mas'ul rahbarlar tomonidan qo‘yilgan ish yurituvchilar faoliyat olib boradi. Ular deyarli uchinchi shaxs. Ishga qo‘yilgan mazkur boshqaruvchilar faqat “kattalardan so‘rashimiz kerak”, degan javobni berishi mumkin, xolos.

Vodiy avtomobillarga siqilgan gaz quyish shoxobchalaridagi narxlarning “rang-barang”ligi haqli savollarni keltirib chiqarmoqda.

Narx yoqilg‘i-energetika resurslarining narx va tariflarini bosqichma-bosqich o‘zgartirish to‘g‘risidagi ma'lum qarorga asosan ko‘tarilgan bo‘lsa yoki soliq siyosatidagi o‘zgarishlar ta'sirida oshgan bo‘lsa, uch viloyatda uch xil bo‘lishi mumkin bo‘lmas holat.

Yodingizda bo‘lsa, bir yarim oy oldin, 2018 yilning noyabr oyida ham vodiy “zapravka”larida aynan xuddi shunday holat kuzatilgan va uzoq muhokamalardan so‘ng metan gaz narxi barcha shoxobchalarda bir xil 1900 so‘mga keltirilgan edi.

Biz esa, Andijon, Farg‘ona viloyatlardagi narxlar bo‘yicha “O‘ztransgaz” AJdan tegishli javob kutib qolamiz.

Elmurod Ermatov,

KUN.UZ muxbiri