O‘zbekiston 2026 yilga borib xorijlik turistlar sonini 9 mln kishiga yetkazishni rejalashtirmoqda 

O‘zbekiston 2026 yilga kelib mamlakatga tashrif buyuruvchi xorijlik turistlar sonini 9 mln kishiga yetkazishni rejalashtirmoqda. Bu O‘zbekiston prezidentining "O‘zbekiston Respublikasida turizmni tezkor rivojlantirish bo‘yicha qo‘shimcha chora-tadbirlar to‘g‘risida"gi farmoni bilan tasdiqlangan 2019-2025 yillarda Turizmni rivojlantirish konsepsiyasida ko‘zda tutilgan.

Hujjatda qayd etilishicha, 2010-2017 yillar davomida turizm xizmatlari eksporti ikki baravarga oshgan va 2017 yilda 546,9 mln, 2018 yilda esa 1 041 mln AQSh dollarini tashkil etgan.

2016 yilga qadar xorijlik tashrif buyuruvchilarning o‘rtacha yillik o‘sishi 8%ni, 2017 yilda esa 7%ni tashkil etgan va 2,69 mln kishidan oshgan. 2018 yil natijalariga ko‘ra, respublikaga 5,3 mlnga yaqin xorijlik turist tashrif buyurgan.

Turizm sohasini rivojlantirishning asosiy bosqichlari etib quyidagilar belgilandi: 

• 2019-2020 yillarda – turizmni rivojlantirishning mustahkam qonunchilik asosini yaratish, infrastrukturani modernizatsiya qilish va mamlakat brendini ilgari surish bo‘yicha institutsional islohotlar o‘tkazish;

• 2021-2025 yillarda – mamlakat iqtisodiyotida turizm sanoati ulushini oshirish. 

Ikkinchi yo‘nalishda mamlakat yalpi ichki mahsulotida turizm ulushini 5%gacha yetkazish (2017 yil yakunlari bo‘yicha – 2,3%) hamda 9 mlndan ortiq, jumladan uzoq xorijdan 2 mln nafar turistni jalb etish maqsad qilingan. 

2025 yilda turizm eksporti o‘sishini 951 mlndan 2,2 mlrd AQSh dollarigacha yetkazish rejalashtirilgan.