Yana bir Dreamliner ishdan chiqdi. Uzbekistan Airways hozircha rasman izoh bermadi

Uzbekistan Airways milliy aviakompaniyasiga qarashli Boeing 787-8 Dreamliner 11 yanvar kuni Dubaydan uchib kelgandan so‘ng, reysdan olingan. UZ24 manbasi xabariga ko‘ra, uning motoridan qirindi topilgan. Motor shu qirindi hisobiga ishdan chiqqan. 

Registratsiya raqami UK-78701 bo‘lgan bu samolyot keyingi vaqtlarda ishdan chiqqan «O‘zbekiston havo yo‘llari» shirkati ixtiyoridagi ikkinchi Dreamliner’dir.

Hozircha Uzbekistan Airways rahbariyati hali ikki yil ham ishlatilmagan eng qimmat yo‘lovchi samolyotlarining ketma-ket ishdan chiqayotgani haqida rasmiy axborot bermadi.

2018 yilning 24 dekabr kuni Uzbekistan Airways’ga qarashli, Moskva-Toshkent yo‘nalishida HY604 reysini amalga oshirgan, registratsiya raqami UK-78702 bo‘lgan Boeing 787-8 Dreamliner samolyoti parvozi 1 soatu 18 daqiqaga kechikkan, bunga samolyotda texnik nosozlik yuzaga kelgani sababligi aytilgandi.

«Ozodlik» nashri reysga qo‘yilganiga ikki yil to‘lmagan qimmatbaho samolyotning motori ishdan chiqqani haqida xabar bergandi. Uzbekistan Airways bu xabarga munosabat bildirib, reys haqiqatan ham 1 soat 18 daqiqaga ushlanib qolgani, lekin bunga yo‘lovchilarni samolyotga chiqarish va havo kemasining muzlashga qarshi ishlovi bilan bog‘liq masalalar sabab bo‘lgani haqida ma'lum qilgan, xorij nashrini esa asossiz ma'lumot tarqatishda ayblagandi.