Toshkent viloyatidagi madaniy meros obektlari atrofida biohojatxonalar o‘rnatilmoqda

Toshkent viloyati bo‘ylab yangi tipdagi biohojatxonalar o‘rnatilishi davom etmoqda, ularda hatto nogironligi bo‘lgan kishilar uchun ham sharoit yaratilgan. Viloyat turizmni rivojlantirish departamenti bo‘limi vakillari Kun.uz'ga shu haqida ma'lum qilishdi. 

Viloyat hokimining 2017 yil 22 sentyabrdagi 543-sonli “Turistlar tashrif buyuradigan madaniy meros obektlari, ziyoratgohlar, muzeylar, mehmonxona xizmati, hunarmandlar uylari va boshqa turizm obektlari, umumiy ovqatlanish obektlari xamda aholi gavjum joylar, bozorlar, shohbekat, yo‘l bo‘yi xizmat ko‘rsatish shoxobchalari, istirohat bog‘lari va boshqa xizmat ko‘rsatish obektlaridagi hojatxonalarni sanitariya-gigiyena qoida va me'yorlariga moslashtirish to‘g‘risida”gi qarori ijrosini ta'minlash maqsadida barcha shahar va tumanlar, ayniqsa turistlar ko‘p tashrif buyuradigan hududlarda turistik obektlarning sanitariya-gigiyenik shoxobchalari (SGSh) holati, obodonlashtirish va tozalikka rioya qilish bo‘yicha xatlovlar tashkil etildi. O‘rganish jarayonida hududlar bosqichma-bosqich xatlovdan o‘tkazildi, aniqlangan kamchiliklar haqida ma'lumotnomalar tuzilib, joylarda hokimliklarga taqdimnoma sifatida kiritildi va mutasaddi tashkilotlarga mavjud kamchiliklarni bartaraf etish haqida ko‘rsatmalar berildi. Xo‘jalik yurituvchi sub'yektlarga maslahat va ko‘rsatmalar berildi. Natijada ko‘plab obektlar egalari tomonidan kamchiliklar bartaraf etildi. 

Jumladan, Turizmni rivojlantirish davlat qo‘mitasining komissiyasi tomonidan aniqlangan kamchilik va muammolarni bartaraf etish yuzasidan jami 61 ta madaniy meros obidasi, ziyoratgoh va qadamjolarning yettitasida hojatxonalar ta'mirlandi yoki yangidan qurildi, obodonlashtirish va tozalash ishlari amalga oshirildi. Yana 9 ta obektni ta'mirlash, obodonlashtirish va konservatsiya qilish uchun 3 mlrd so‘m ajratilgan va tegishli muassasalar tomonidan tashkiliy ishlar amalga oshirilmoqda. Qolgan obektlarda SGShlarni tartibga solishda ishlarni tashkil etish va nazoratni kuchaytirish uchun “Madaniy meros obektlarini muhofaza qilish va ulardan foydalanish ilmiy-ishlab chiqarish Bosh boshqarmasining Toshkent  viloyati davlat inspeksiyasi” ga so‘rov-xati yuborildi. 

Bundan tashqari, viloyatda mavjud AGTKSh va AYoQSh lardan komissiya tomonidan 38 obektning sanitariya-gigiyenik holati qoniqarsiz deb topilgan bo‘lib, hozirgi vaqtda “O‘zdavneftgazinspeksiya” Toshkent viloyat hududiy boshqarmasiga ko‘rsatma-xat yuborilgan bo‘lib, kamchiliklarni bartaraf etishga doir ishlar olib borilmoqda. Hamkorlikda olib borilgan ishlar natijasida sayyohlar ko‘p ziyorat qiladigan obektlarda zamonaviy SGShlari  qurildi, turistlar diqqatini tortuvchi obektlar o‘rnatildi. Zarur hujjatlar rasmiylashtirilgan holatda qurilish, obodonlashtirish va ko‘kalamzorlashtirish ishlariga sarflangan xarajatlar ijara to‘lovlardan ayrilishi nazarda tutilganligi haqida madaniy meros obektlari egalariga tushuntirildi.

Rejaga asosan Toshkent viloyati bo‘ylab yangi tipdagi biohojatxonalar o‘rnatilishi davom etmoqda. Ohangaron tumanidagi Shoabdumalik ota ziyoratgohi yonida namunaviy yangi tipdagi hojatxona o‘rnatildi. Piskent tumanidagi “Parpi ota” ziyoratgohida barcha qulayliklarga ega bo‘lgan, jumladan, nogironligi bo‘lgan kishilar uchun ham sharoit yaratilgan hojatxona ishga tushirildi.

Shuningdek, dekabr oyida o‘rnatilishi rejalashtirilgan jami 8 ta ana shunday hojatxonadan 6 tasi o‘rnatildi va foydalanishga topshirildi. Ular turistlar serqatnov manzillarda - Parkent tumanidagi Gulobod MFY, So‘qoq qishlog‘i Chashma MFY, Xusorak qishlog‘i Quyosh MFY hamda Piskent tumanidagi  Bobog‘ozi Turktog‘on buva qabristoni kabi hududlarda joylashtirildi.