O‘zbekiston maxsus bo‘linma harbiylari ilk bor AQShdagi mashg‘ulotlarda qatnashmoqda

O‘zbekiston Mudofaa vazirligi maxsus bo‘linma harbiy xizmatchilari 11 yanvardan AQShning Kemp-Shelbi harbiy bazasida bo‘lib o‘tayotgan “Janubiy zarba” hamkorlikdagi mashg‘ulotlarda ishtirok etishmoqda. Bu haqda Mudofaa vazirligi matbuot xizmati xabar berdi.

Xabarda aytilishicha, ular bugungi kunga qadar ikkita hamkorlikdagi mashqlarni o‘tkazishdi.

O‘zbekiston mudofaa vaziri general-leytenant Abdusalom Azizov boshchiligidagi harbiy delegatsiya mazkur mashg‘ulotlarning uchinchi – asosiy fazasini kuzatish uchun AQShga jo‘nab ketdi.

 “Janubiy zarba” taktik mashg‘ulotlari Missisipi shtati Milliy gvardiyasi tomonidan Galfport shahrida joylashgan jangovar tayyorgarlik va birlashgan kuchlarning Kemp-Shelbi o‘quv bazalarida o‘tkaziladigan yirik o‘quv-jangovar mashg‘ulotlari hisoblanadi. O‘quv mashg‘ulotlari barcha qo‘shin turlari hamda qo‘riqlov bo‘linmalari, zaxira kuchlari va doimiy qo‘shinlar uchun amaliyotda jangovar shaylikni ushlab turish hamda AQSh va asosiy ittifoq qurolli kuchlari o‘rtasidagi hamkorlik masalalarini ta'minlash kabi maqsadlarni o‘z ichiga oladi. 

Mazkur keng miqyosdagi mashg‘ulotlarda Kanada, Chili va Niderlandiya harbiylari ham qatnashmoqda.

AQShga rasmiy tashrif davomida O‘zbekiston harbiy delegatsiyasi Tampa shahridagi CENTCOM bosh qarorgohiga ham tashrif buyurib, uning rahbariyati bilan muzokaralar o‘tkazishi rejalashtirilgan.

Eslatib o‘tamiz, 2018 yil 12 may kuni O‘zbekiston mudofaa vaziri Abdusalom Azizov Amerika Qo‘shma Shtatlari CENTCOM qo‘mondoni general Jozef Votella hamda 18 sentabr kuni Missisipi shtati Milliy gvardiyasi qo‘mondoni shtat gubernatori o‘rinbosari, general-mayor Jyenson D. Boylz boshchiligidagi harbiy delegatsiyalarni kutib olgan edi.