«Kolumbiyaga 5000 askar»: Jon Boltonning daftaridagi «sirli» yozuv OAVni qiziqtirib qo‘ydi

Venesuela bo‘yicha brifingda muxbirlar Oq uyning milliy xavfsizlik bo‘yicha maslahatchisi Jon Bolton qo‘lidagi daftarda “Kolumbiyaga 5000 askar” degan yozuvni payqashgan va bu nimani anglatishi mumkinligi haqida bosh qotirishga tushishgan. Vashingtonda ta'kidlanishicha, Venesuela bilan chegaradosh davlatga qo‘shin yuborish haqida qaror yo‘q, biroq Venesuela muxolifati yetakchisi Xuan Guaydoni qo‘llab-quvvatlashning barcha choralari ko‘rib chiqilmoqda.

Boltonning daftarida quyidagi yozuv bo‘lgan: “Afg‘oniston muloqotga tayyor, Kolumbiyaga 5000 askar” 

“Prezident aytganidek, barcha variantlar ko‘rilmoqda”, deb javob bergan Oq uy vakili AQShning Kolumbiyada qo‘shin joylashtirish rejalari haqidagi savolga. Boltonning o‘zi AQShning Venesueladagi vaziyatga harbiy aralashuvi haqidagi savolga “Barcha variantlar ko‘rilmoqda”, deb javob qilgan.

Fox News’ning ma'lum qilishicha, Oq uyda Kolumbiyaga qo‘shin tashlash ehtimoli muhokama qilingan, biroq bunday qaror qabul qilinmagan. Amerikalik tahlilchilarga iqtibos keltirgan Huffington Post nashrining ma'lum qilishicha, Donald Tramp ma'muriyatida Venesueladagi vaziyatga harbiy aralashuv rejasi yo‘q: harbiy kuch qo‘llanishi o‘zi shundoq ham gumanitar inqirozdan aziyat chekayotgan mamlakatda zo‘ravonlik avj olishiga olib kelishi va falokatga aylanishi mumkin.

Kolumbiya tashqi ishlar vazirligi Boltonning daftarida Kolumbiyaga askarlar yuborish yozuvi nima sababga ko‘ra paydo bo‘lganidan bexabarliklari aytilgan. Shunga qaramay, vazirlikda rasmiy Bogota Vashington bilan o‘zaro manfaatli barcha masalalar bo‘yicha munosabatlarni rivojlantirishi va “Lima guruhi” tutayotgan pozitsiyaga qo‘shilishi aytilgan.

Avvalroq Kolumbiya mudofaa vazirligida hukumat AQShga Venesuelaga kirish uchun harbiy bazalar taqdim qilishni rejalashtirmayotgani ma'lum qilingan.