«O‘zbekiston temir yo‘llari» aksiyadorlik jamiyatida Fransiyaning «Freyssine» kompaniyasi vakillari bilan uchrashuv bo‘lib o‘tdi. Unda «Freyssine» kompaniyasi bilan hamkorlikda «O‘zbekiston temir yo‘llari» aksiyadorlik jamiyati tarkibida ehtiyojlar uchun Samarqand viloyatining Paxtachi tumanida yangi sement zavodini tashkil etish masalasi ko‘rib chiqildi, deb xabar bermoqda jamiyat axborot xizmati.
Ma'lum qilinishicha, yig‘ilishda mazkur inshoot qurilishi belgilangan hududning geologik holati bo‘yicha tekshiruvlarni o‘tkazish, zavodga xorijdan yangi texnika va texnologiyalarni olib kelish, korxonaning kelajakdagi salohiyati haqida fikr yuritilgan.
Mutaxassislarning ta'kidlashicha, yangi tashkil etilayotgan zavod yiliga 1 mln. tonna yuqori sifatli sement mahsuloti ishlab chiqarish quvvatiga ega bo‘ladi.
Tadbirda shuningdek, poytaxtda qurilishi rejalashtirilayotgan bir qator yo‘l o‘tkazgich va ko‘priklar, yangi metro liniyalarining loyihalari fransiyalik mutaxassislar tomonidan taqdim etildi. Yangicha dizayn, o‘zgacha uslub, jahon standartlariga mos keladigan bunday inshootlarni bunyod etish bo‘yicha mulohazalar ham bildirildi.
