Samarqand shahri tarixiy markazida balandligi 10 metrdan ziyod bo‘lgan noqonuniy obektlar buziladi

Samarqand viloyat hokimligida viloyat hokimi Erkinjon Turdimov rahbarligida O‘zbekiston Respublikasi Prezidenti Administratsiyasining 2019 yil 6 fevraldagi topshiriqlari ijrosini ta'minlash bo‘yicha yig‘ilish o‘tkazildi.

Mazkur topshiriqda bir hafta muddatda o‘tkazilgan xatlov natijalarini Madaniyat va Qurilish vazirliklarining qo‘shma majlisida muhokama qilib, Samarqand shahrining tarixiy markazidagi jami 159ta obektda aniqlangan qonunbuzilishi holatlarini bartaraf etish bo‘yicha «Yo‘l xaritasi»ni tuzish hamda Samarqand viloyati hokimligida viloyat hokimi rahbarligida shtab tashkil etish belgilangan.

Qayd etib o‘tish lozimki, 2018 yilda Bosh prokuratura tomonidan Vazirlar Mahkamasi, Qurilish, Madaniyat vazirliklari va Samarqand viloyati hokimligi bilan birgalikda Samarqand shahrining tarixiy markazida yangi qurilgan bino-inshootlar xatlovdan o‘tkazilgan.

O‘rganish natijasida 2015-2018 yillarda jami 159ta (75ta turar, 84ta noturar) obektlar shaharsozlik normalariga to‘liq rioya etilmasdan noqonuniy qurilgani aniqlangan.

Jumladan:

·       34ta obektning yer ajratish yoki qurilishga ruxsat berishga oid tegishli hokim qarorlari chiqarilmagan;

·       73ta obektning loyihalariga ekspertiza xulosalari olinmagan;

·       102ta obektga shaharsozlik kengashining xulosalari olinmagan;

·       120ta obekt Madaniyat vazirligi va 59tasi «ToshboshplanLITI» DUK bilan kelishilmagan.

Respublika ishchi guruhi tomonidan o‘rganish natijasida qurilish normalariga rioya qilmaganliklari uchun 132 nafar shaxs ma'muriy javobgarlikka tortilgan, shahar hokimining 56ta qaroriga protest keltirilgan, bitta jinoyat ishi qo‘zg‘atilgan, noqonuniy qurilgan obektlarni buzish haqida sudlarga 12ta da'vo arizasi kiritilgan.

Shuningdek, mazkur 159ta obektning 18tasi respublika miqyosida, 141tasi viloyat miqyosida hal etilishi bo‘yicha xulosa tuzilgan.

Mazkur obektlarni bartaraf etish yuzasidan Respublika vazirlik va idoralari tomonidan loyiha-smeta hujjatlari ishlab chiqish boshlandi. 

·       Viloyat miqyosida hal etilishi belgilangan 141ta obektning 16tasida qurilish ishlari boshlanmagan;

·       12tasi qisman buzilishi;

·       62tasining fasad ko‘rinishini Madaniyat vazirligi bilan kelishilishi;

·       46tasining shaharsozlik hujjatlari rasmiylashtirilib, qonunga muvofiqlashtirilishi belgilangan.

«Samarqand shahrining 1269 gektardan iborat tarixiy markazidagi quriladigan binolar shaharning qadimiy va milliy arxitekturasiga mos bo‘lishi, fasadi turli zamonaviy konstruksiyalar, sun'iy materiallar va bo‘yoqlardan emas, tabiiy qurilish materiallari bilan bezalishi shart. Binolardan Samarqandning nuqsi kelib turishi kerak. Shaharning tarixiy markazida quriladigan binoning balandligi 10 metrdan oshishiga yo‘l qo‘yilmaydi. Bu talabga zid bo‘lgan har qanday bino buziladi va talabga moslashtiriladi. Hali qurilmaganlarini ham qayta loyihalash zarur bo‘ladi», — deya Samarqand viloyat hokimi Erkinjon Turdimovning so‘zlarini keltirmoqda Kun.uz muxbiri.

Viloyat hokimi 1 martga qadar 141ta obekt to‘liq talabga moslashtirilishi va belgilangan balandlikdan ortiq bo‘lgan qismi buzilishi kerakligini ta'kidlab o‘tdi.

18ta obekt esa 1 aprelga qadar to‘liq buzib tashlanishi e'lon qilindi.

«Kim belgilangan talablar bo‘yicha ishlamoqchi bo‘lsa, bunday obektlarning hujjatlashtirilishida viloyat hokimligining o‘zi yordam beradi. Aks holda, bunday noqonuniy qurilayotgan binolarning taqdiri sud tartibida ko‘rib chiqiladi», — degan Turdimov.

Yuqorida sanab o‘tilgan 15ta noqonuniy barpo etilgan obekt ichida turarjoy binolari ham bo‘lib, ularni talabga moslashtirish jarayonida uy-joylari buzilayotgan fuqarolarga Samarqand viloyat hokimligi tomonidan vaqtinchalik turar joy bilan ta'minlash choralarini ko‘riladi.

Samarqand viloyat hokimligi Moliya vazirligi bilan birgalikda ko‘p qavatli turarjoylarning yuqori qavatlarini quyi qavat konstruksiyasiga ta'sir qilmagan holda buzish imkonini beruvchi maxsus uskunalarni xarid qilish yoki ijaraga olish masalasini ham o‘rganmoqda.

Shuhrat Shokirjonov,
Kun.uz muxbiri