Pokistonda samolyot falokatga uchrashini iltijo qilgan yo‘lovchi reysdan olindi

Foto: wikipedia.org / PD

Islomobod aeroportida yo‘lovchilardan biri o‘z duosida samolyotning falokatga uchrashini so‘ragandan keyin samolyotdan tushirib yuborildi. Bu haqda Pokistonning Geo TV telekanali ma'lum qildi.

Halil ismli yo‘lovchi Islomoboddan Dubay orqali Avstraliyaga uchishi kerak bo‘lgan.

U o‘z o‘rnini egallagach, samolyotning falokatga uchrashini so‘ray boshlagan va bu bilan qolgan yo‘lovchilar hamda ekipaj a'zolari o‘rtasida sarosima keltirib chiqargan. Uchuvchi bu haqda aeroport xavfsizlik xizmatiga xabar bergach, yo‘lovchi samolyotdan tushirilgan.