Prezident videoselektori: Toshkent shahrida tushum prognozlari bajarilmagan. Poytaxtning 7ta tumanida bosh soliqchilar ishdan olindi

O‘zbekiston Respublikasi Prezidenti Shavkat Mirziyoyev raisligida 4 aprel kuni 2019 yilning birinchi choragi yakunlari bo‘yicha Davlat budjetiga tushumlar va eksport prognozlari ijrosi natijadorligi hamda birinchi yarim yillik uchun belgilangan ko‘rsatkichlarning so‘zsiz bajarilishini ta'minlash yuzasidan videoselektor yig‘ilishi bo‘lib o‘tdi.

Birinchi chorakda mamlakatimiz bo‘yicha budjet tushumlari to‘liq bajarilib, o‘tgan yilning mos davriga nisbatan 2 barobar ko‘p ijro etilgan. Chorak yakuni bo‘yicha mahalliy budjet daromadlari rejaga nisbatan 1 trillion 253 milliard so‘m ortig‘i bilan bajarilib, hududlar ixtiyorida o‘tgan yilning mos davriga nisbatan 1,5 barobar ko‘p mablag‘ qoldi.

«Mahalliy budjetda qancha ko‘p daromad bo‘lsa, dolzarb bo‘lgan ijtimoiy masalalarni shuncha tezkorlik bilan hal qilish mumkin. Qo‘shimcha mablag‘lar, jumladan, «Beshta tashabbus», «Obod qishloq», «Obod mahalla», «Ichimlik suvi», «Har bir oila tadbirkor» kabi davlat dasturlarini joylarda tizimli amalga oshirish, xalqning daromadini ko‘paytirish va hayotini yaxshilash uchun zarur bo‘ladi», deya davlat rahbari so‘zlarini keltirmoqda prezident matbuot xizmati.

Shavkat Mirziyoyev ushbu vazifani hamma rahbar ham birdek anglab yetmayotganini keskin tanqid qilgan. Jumladan, budjetga jami tushumlar prognozi 9ta tuman va shaharda bajarilmagan.

Ayniqsa, Toshkent shahrining o‘n bir tumanidan 7tasida  jami tushum prognozi bajarilmagan. Ushbu tumanlar soliq inspeksiyalari rahbarlari lavozimlaridan ozod etildi (Uchtepa, Mirobod, Bektemir, Yunusobod, Mirzo Ulug‘bek, Shayxontohur va Sergeli tumanlari - tahr.).

Shahar hokimligi va soliq idoralari rahbarlarini budjetga tushumlarni ta'minlashda sustkashlikka yo‘l qo‘yilganligi qattiq tanqid ostiga olindi.

Bunday holatlar boshqa viloyatlarda ham qayd etilgan. Shu sababli Davlat soliq qo‘mitasiga mahalliy budjetga tushum prognozi bajarilmagan bir qator tuman va shahar soliq idoralar rahbarlarining lavozimiga loyiqligini tanqidiy ko‘rib chiqish topshirildi.

Ma'lumki, O‘zbekiston soliq siyosatini takomillashtirish konsepsiyasining asosiy maqsadi soliq yukini teng taqsimlashdan iborat.

Prezidentimiz ta'kidlaganidek, soliq islohotlarini samarali amalga oshirish uchun hukumat oldida juda ko‘p vazifalar turibdi.

Jumladan, joriy yildan boshlab qo‘shilgan qiymat solig‘i to‘lovchilari soni qariyb 5 baravarga oshgan. 

Qo‘shilgan qiymat solig‘ini hisoblashning samarali va sodda mexanizmlarining joriy etilmaganligi sababli, ushbu tizimga yangi o‘tgan 26 mingta korxonadan 9 mingtasi soliq hisobotlarini topshirishda turli xatoliklarga yo‘l qo‘yilganligi soliq organlari tomonidan aniqlangan.

Vazirlar Mahkamasi va Davlat soliq qo‘mitasiga bir oy muddatda xalqaro ekspertlar bilan birga O‘zbekistonda soliq islohotlarini amalga oshirishda vujudga kelayotgan muammolarni bartaraf etish bo‘yicha qaror loyihasini ishlab chiqish topshirildi.

Budjet tushumlarini ta'minlashdagi asosiy to‘siqlardan biri iqtisodiyotda norasmiy faoliyatning saqlanib qolinayotganidir.

Prezident bu boradagi ishlar natijalari mutlaqo qoniqarli emasligini ta'kidlagan. Shu sababli bu borada qabul qilingan dasturiy choralarni jonlantirish topshirilgan.