1 iyundan svet va gazning narxi oshmaydigan bo‘ldi - Moliya vazirligi

2019 yilning 1 iyunidan boshlab O‘zbekistonda elektr energiyasi va tabiiy gazning narxi oshmaydigan bo‘ldi, deb xabar bermoqda Kun.uz’ga Moliya vazirligining matbuot xizmati.

Eslatib o‘tamiz, O‘zbekiston Respublikasi Vazirlar mahkamasining 2018 yil 1 noyabrdagi «Yoqilg‘i-energetika resurslarining narx va tariflarini bosqichma-bosqich o‘zgartirish to‘g‘risida»gi №897-sonli qaroriga muvofiq 2019 yil 1 iyundan boshlab tabiiy va suyultirilgan gaz va elektr energiyasi uchun narxlar oshirilishi nazarda tutilgandi. Chunonchi, maishiy iste'molchilar uchun 1 metr kub tabiiy gazning narxi hozirgi 320 so‘mdan 350 so‘mgacha, elektr energiyasining 1 kilovatti hozirgi 250 so‘mdan 280 so‘mgacha oshishi kerak edi.

«Tabiiy gaz va elektr energiyasiga belgilangan narxlar oshiriladi, lekin 1 iyundan emas. Biz narx oshirilishini vaqtincha to‘xtatib qo‘ydik», — deyishgan Moliya vazirligidagilar.

Avvalroq, Markaziy bankdagilar fevral-mart oyidagi cho‘qqiga erishilgach, yillik inflatsiya pasaya boshlashi, biroq iyun oyidagi elektr energiyasi va tabiiy gazga avvaldan belgilangan narx oshirilishi uning pasayishini to‘xtatuvchi omil bo‘lib xizmat qilishini aytib o‘tishgan edi.

«2019 yilda inflatsiya sur'ati tezlashishining asosiy xatarlari iqtisodiyotda yuqori inflyatsion kutilmalarning saqlanib qolishi, QQS bo‘yicha yangi to‘lov mexanizmining joriy etilishi hisobiga alohida tovar va xizmatlar narxlarining o‘sishi, shuningdek energiya resurslari narxlari oshirilishining ikkilamchi ta'siri ko‘lamining kengayish ehtimolining mavjudligi bilan bog‘liq», — deyishgandi yanvarda MBdagilar.