Shvetsiya sudi Julian Assanjni sirtdan hibsga olishni rad etdi

Uppsala okrug sudi prokuraturaning Shvetsiyada jinsiy zo‘ravonlikda ayblanayotgan WikiLeaks sayti asoschisi Julian Assanjni hibsga olish so‘rovini rad etdi.  

"Prokuraturaning hibsga olish so‘rovi uchun asoslardan biri surishtiruvni davom ettirish zarurati edi, ammo hibsga olish uchun avvalgi order Assanj Ekvador elchixonasida ekanligida berilgan, hozirda esa u Buyuk Britaniyada hibsda", - dedi sudya.

Uning so‘zlariga ko‘ra, hozirda Assanjni sirtdan hibsga olish "noproporsional chora hisoblanadi".

Sud majlisi yopiq tarzda bo‘lib o‘tdi. Prokuror Yeva-Mari Persson uning Buyuk Britaniyadan ekstraditsiya qilinishini so‘rash uchun Assanjni hibsga olishni talab qildi.

WikiLeaks asoschisi AQSh so‘rovi bilan Britaniyada 11 aprelda hibsga olingandi. Britaniya sudi 2 may kuni AQShga Assanjni ekstraditsiya qilish uchun yuridik asoslangan so‘rovni berish uchun 65 kunlik muhlat bergan.