Qozog‘iston energetika vazirligi AES qurish bo‘yicha tender e'lon qilingani haqidagi xabarni rad etdi

Janubiy Koreya kompaniyalari bilan AES qurish bo‘yicha muzokaralar o‘tkazilayotgani haqidagi xabar haqiqatga zid, deb ma'lum qildi Qozog‘iston energetika vazirligi.

Vazirlikning bildirishicha, Qozog‘istonda atom elektr stansiyasi qurilishining texnik-iqtisodiy asoslarini ishlab chiqish bo‘yicha hech qanday ish olib borilmayapti. 

Avvalroq Janubiy Koreyaning BussinesKorea nashri Korea Hydro & Nuclear Power (KHNP) davlat korporatsiyasi 31 may kuni Qozog‘istonda ikkita AES bo‘yicha loyihalash, xarid qilish hamda qurishda ishtirok etish niyatida ekanligi haqida xabar tarqatgandi.

Vazirlik vakili Nurlibek Jyenisbek Janubiy Koreya OAVlarida e'lon qilingan xabar haqiqatga zid ekanligini ma'lum qildi.

"Qozog‘istonda AES qurish loyihasi bo‘yicha xalqaro tender o‘tkazilmayapti va o‘tkazish rejalashtirilmagan", – deyiladi energetika vazirligi bayonotida.