Yangi temir yo‘l vokzali ishga tushdi. Endi Toshkent-Andijon yo‘nalishidagi poyezdlar Angrenda to‘xtab o‘tadi

Toshkent-Andijon-Toshkent yo‘nalishidagi poyezdlar yangi qurilgan Angren vokzalida to‘xtab, yangi yo‘lovchilarni olib o‘z yo‘lida davom etmoqda.

O‘zbekiston Respublikasi Prezidentining 2013 yil PK-1985 sonli qaroriga asosan «Elektrlashtirilgan Angren-Pop temir yo‘l qurilishi» tarkibiga kiruvchi Angren temir yo‘l vokzali qurib bitkazildi. 

Bir vaqtning o‘zida 250 kishiga xizmat ko‘rsatadigan Angren temir yo‘l vokzalining umumiy maydoni 3,5 gektar bo‘lib, 250 metrlik shinam to‘xtash yo‘lagi fuqarolarga qulaylik yaratish maqsadida qurilgan.

Milliylik va zamonaviylik uyg‘unlashgan, Angren aholisiga beminnat xizmat ko‘rsatishni boshlagan mazkur vokzalga tashrif buyurdik. 

Ushbu  zamonaviy vokzalni ko‘zdan kechirar ekanmiz, ona va bola xonasi, tibbiyot xonasi, yuqori darajadagi kutish zali (VIP), bufet, milliy sovg‘alar shoxobchasi, mobil qurilmalar uchun quvvatlash manbai, shuningdek, namozxonalar shinam va qulay qilib qurilgan. 

E'tiborli jihati, mahalliy aholi vakillari uchun 30 foizgacha chegirmalar yo‘lga qo‘yilgan.

Yaratilgan bu qulayliklardan bugun Angren aholisi ham xursand. Ham arzon ham qulay transport qatnoviga ega bo‘lgan aholi vakillarining quvonchi cheksiz.