Hindistonda momaqaldiroq vaqtida 8 bola halok bo‘ldi

Hindiston shimolidagi Bixar shtatida joylashgan qishloqlardan birida momaqaldiroq vaqtida 9 kishi, jumladan 8 bola halok bo‘ldi, o‘ndan ko‘proq odam jarohat oldi. Bu haqda News Nation mahalliy elektron nashri xabar berdi. 

Voqea 19 iyul kunduzi yuz bergan. Dastlabki ma'lumotlarga ko‘ra, Dxanpur qishlog‘ida balog‘atga yetmagan bir guruh bolalar yomg‘ir vaqtida ko‘chada o‘ynab yurganda ularni chaqmoq urgan. Ta'kidlanishicha, bolalarning barchasi bir oilaning a'zolari bo‘lgan. Boshqa tafsilotlar keltirilmagan.  

Jarohatlanganlar shifoxonaga yetkazilgan, ularga zaruriy yordam ko‘rsatilgan. Shtat bosh vaziri Nitish Kumar voqea yuzasidan hamdardlik bildirgan va halok bo‘lganlarning yaqinlariga 400 ming rupiydan (6 ming dollarga yaqin) kompensatsiya to‘lanishi haqida qaror chiqargan.